धनराशी र कल्पतमा सुरु गरे एमालेको स्वयंसेवकले पुनर्स्थापनाको काम

नेकपा एमालेका स्वयंसेवकहरूले जाजरकोटका भूकम्प प्रभावितमध्येको सबैभन्दा विकट बस्ती धनराशीमा पुनर्स्थापनाको काम सुरु गरेका छन्। कुशे गाउँपालिकाकाे धनराशिमा स्वयंसेवक समूहले आजदेखि जोखिममा रहेका घरहरूको सफाइ र अस्थायी टहरा निर्माणको काम सुरु गरेको हो।

त्यसैगरी नलगाड नगरपालिकाकाे कल्पतमा पनि आज देखि काम सुरु भएको एमालेले जानकारी दिएको छ। एमालेका स्वयंसेवकहरूले जाजरकाेमा हालसम्म १ सय ४९ वटा घरकाे भग्नावशेष हटाएका छन्। नलगाड, भेरी र कुशेका विभिन्न ठाउँमा ४१ वटा अस्थायी टहरा निर्माण गरिएको पार्टी केन्द्रीय सदस्य निरज आचार्यले जानकारी दिए ।

उता रुकुम पश्चिमको चौरजहारी नगरपालिका-११, खाेलागाउँ र आठबीसकाेट नगरपालिका-१३, घेत्मामा लुम्बिनीका स्वयंसेवकहरूको समूहले काम गरिरहेकाे पार्टी केन्द्रीय विपद व्यवस्थापन तथा स्वयंसेवा विभागका प्रमुख किरण पौडेलले बताए।

गत कात्तिक १७ गते राती गएको भूकम्पबाट प्रभावित जाजरकोट र रुकुम पश्चिममा एमालेले ११ सय स्वयंसेवक परिचालन गरेर पुनर्स्थापना र नवनिर्माणको काम गरिरहेको छ।