अमेरिका अलमलिएका बेला जापान र कोरियालाई फकाउँदै चीन

अमेरिका राष्ट्रपतीय निर्वाचनपछि शक्ति हस्तान्तरणमा अलमलिएका बेला चिनियाँ विदेशमन्त्री वाङ यीले जापान र दक्षिण कोरियाको भ्रमण गरेका छन्।

टोकियो हुँदै सोल पुगेका वाङले समकक्षीहरुका अलावा जापानी प्रधानमन्त्री योसिहिदे सुगा र दक्षिण कोरियाली राष्ट्रपति मुन जे इनसँग पनि भेटवार्ता गरेका छन्।

नोभेम्बर १५ मा रिजनल कम्प्रिहेन्सिभ इकोनाृमिक पार्टनरसीप (आरसीईपी) मा हस्ताक्षर भएलगत्तै वाङ यी मुलुकको भ्रमणमा पुगेका हुन्। १५ मुलुक सहभागी सो व्यापार सम्झौतामा अमेरिका भने सहभागी भएन।

‘यो संसारमा अमेरिका एउटा देश मात्र छैन,’ सोलमा वाङले भने, ‘विश्वमा करिब १९० मुलुक छन्। ती सबै स्वतन्त्र छन्। चीन र दक्षिण कोरिया पनि तिनैमध्येका हुन्।’

टोकियोमा प्रधानमन्त्री सुगाको साथमा विदेशमन्त्री वाङ

जापान र दक्षिण कोरिया दुवै अमेरिकी सैन्य गठबन्धनमा सहभागी छन्। दुवै मुलुकमा अमेरिकी सेनाको उपस्थिति छ। तर, पछिल्लो समय अमेरिकालाई चीनले शक्तिमा टक्कर दिन थालेसँगै यी दुई मुलुकसँगको चीनले सम्बन्ध बलियो बनाउने प्रयास गरिरहेको छ।