एनसेलको टावरमा आगजनी गरेको आरोपमा विप्लवका जिल्ला नेता पक्राउ

नेत्रविक्रम चन्द समूहका डोटी जिल्ला कमिटी सदस्य कृष्णबहादुर बोहरालाई प्रहरीले पक्राउ गरेको छ।

जिल्लामा रहेका विभिन्न ठाउँका एनसेलको टावरमा आगजनी तथा क्षति गरेको आरोपमा बोहरालाई बडिकेदार गाउँपालिका–१ बीपीनगरबाट पक्राउ गरिएको जिल्ला प्रहरी कार्यालयका प्रमुख जनकराज पाण्डेले बताए।

‘बोहरालाई एनसेल टावरमा आगजनी र क्षतिलगायतका गतिविधि गरेको भन्ने उजुरीका आधारमा हामीले खोजी गरिरहेका थियौँ’, पाण्डेले भने, ‘बीपीनगरमा फेला परेपछि आवश्यक अनुसन्धानका लागि पक्राउ गरेका हौँ।’

पक्राउ परेका बोहरासँग एनसेलमा गरिएको क्षतिलगायत अन्य गतिविधिका विषयमा आवश्यक अनुसन्धान भइरहेको जिल्ला प्रहरीले जनाएको छ। रासस