युनिकोड
सिंहदरबार गेटमा आठ दिनदेखि धर्नामा रहेकी बिनु यादवसँग महिला, बालबालिका, लैंगिक तथा यौनिक अल्पसङ्ख्यक र सामाजिक सुरक्षा मन्त्री सिता बादीले आज (मंगलबार) मन्त्रालयमा भेटवार्ता गरेकी छन्।
भेटवार्ताका क्रममा यादवले आफ्नो मुद्दासँग सम्बन्धित न्यायिक प्रक्रिया, स्वास्थ्य अवस्था, जीविकोपार्जन तथा आफूले उठाउँदै आएका अन्य मागका विषयमा मन्त्रीसमक्ष आफ्ना धारणा राखेकी थिइन्।
उनले यसअघि सरकार पक्षसँग भएको सहमति कार्यान्वयनका लागि पहल गरिदिन आग्रह गर्दै मन्त्रालयसमक्ष लिखित निवेदनसमेत पेस गरेकी छन्।
मन्त्री सीता बादीले बिनु यादवले उठाएका विषयप्रति मन्त्रालय संवेदनशील रहेको उल्लेख गर्दै मन्त्रालयको कार्यक्षेत्रभित्र पर्ने विषयमा आवश्यक पहल, समन्वय र सहजीकरण गरिने बताइन्।
उनले सम्बन्धित निकायसँग आवश्यक समन्वय गरी कानुनबमोजिम प्रक्रिया अघि बढाउन मन्त्रालयले आफ्नो भूमिकाअनुसार आवश्यक सहयोग गर्ने प्रतिबद्धता व्यक्त गरिन्।
भेटवार्ताका क्रममा बिनु यादवको स्वास्थ्य अवस्था, आवश्यक सहयोग तथा जीविकोपार्जनसँग सम्बन्धित विषयमा समेत छलफल भएको थियो।
साथै मन्त्रालयको कार्यक्षेत्रभन्दा बाहिर रहेका विषयहरू सम्बन्धित निकायमा आवश्यक पहलका लागि पठाइने विषयमा समेत छलफल भएको मन्त्रीको सचिवालयले जनाएको छ।
प्रतिक्रिया