नेकपाको वक्तव्यमा अध्यक्ष प्रचण्डको नामनै अशुद्ध

सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल प्रचण्डले आज शनिबार जारी गरेको ३ पेज लामो संयुक्त वक्तव्यमा दाहालको नाम नै अशुद्ध छ।

आज जेठ ३ गते २७औं मदन–आश्रित स्मृति दिवस तथा पार्टी एकीकरणको दोस्रो वर्षगाँठको सन्दर्भमा अध्यक्षद्वयले ३ पेज लामो संयुक्त वक्तव्य जारी गरेका हुन्। जसमा नेकपालाई लोकतान्त्रिक धारमा ल्याउन मदन भण्डारीको वैचारिक योगदान र पार्टी एकताबारे चर्चा गरिएको छ।

३ पेज लामो वक्तव्यको पुछारमा अध्यक्ष ओलीले बायाँ र प्रचण्डले दायाँतिर हस्ताक्षर गरेका छन्। जहाँ पुष्पकमल दाहाल ‘प्रचण्ड’ लेख्ने क्रममा ‘दहाल’ लेखिएको छ। पार्टी केन्द्रीय कार्यालयबाट बिहानै सञ्चारमाध्यमलाई इमेल गरिएको वक्तव्यको पीडीएफ र वर्ड फाइल दुवैमा प्रचण्डको नाम अशुद्ध छ।

पछिल्लो समय राज्यका महत्वपूर्ण निकाय र नेकपाका नेताहरूका वक्तव्यमा यस्ता गल्ती पटक पटक दोहोरिँदै आएका छन्।