युनिकोड
जिल्ला अदालत, काठमाडौँले नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीको प्रभावकारी उपचार व्यवस्था मिलाउन आदेश दिएको छ।
जिल्ला अदालतका न्यायाधीश आनन्दप्रसाद श्रेष्ठको इजलासले अनुसन्धानका लागि ५ दिन म्याद दिँदै यस्तो आदेश दिएको हो। ‘प्रतिवादी केपी शर्मा ओली अस्वस्थ भई उपचारार्थ अस्पतालमा रहेको भन्ने समेत देखिँदा निजको प्रभावकारी आवश्यक उपचारको व्यवस्था गर्न यो आदेश गरिदिएको छ’, अदालतको आदेशमा भनिएको छ।
प्रहरीले शनिबार बिहानै पक्राउ गरेर पूर्वप्रधानमन्त्री ओली र उनी नेतृत्वकै सरकारका गृहमन्त्री रमेश लेखकलाई हिरासतमा राखेर अनुसन्धान गर्न अनुमति माग गरेको थियो। लेखकलाई म्याद थपका लागि अदालतमा उपस्थित गराइए पनि ओलीलाई भने भिडिओ कल गरेर सोधिएको थियो। इजलासको भिडिओ कलमा केहीबेर बसेर ओली बाहिरिएका थिए।
लेखक भने बहस हुँदा इजलासमै बसे। प्रहरीले प्रतिवादीहरूको बयान गर्न, बुझ्नु पर्ने मानिसहरूको घटना–विवरण कागज गर्न तथा जेनजी आन्दोलन जाँचबुझ आयोगको प्रतिवेदन अध्ययन विश्लेषण गर्ने लगायतको प्रयोजनका लागि अनुमति माग गरेको थियो।
जेनजी आन्दोलन दमन गर्न प्रहरीलाई आदेश दिएको भन्दै उनीहरुलाई मुद्दा चलाउन गौरीबहादुर कार्की नेतृत्वको आयोगले सिफारिस गरेको छ। सोही सिफारिस अनुसार अन्यको हकमा थप अध्ययन गरेर मात्रै कार्यान्वयनबारे निर्णय गर्ने तर ओली र लेखकलाई तत्काल पक्राउ गरे। मुद्दा चलाउने सरकारले निर्णय गरेको छ। सरकारको निर्णय लगत्तै शनिबार बिहानै ओली र लेखकलाई प्रहरीले पक्राउ गरेको हो।
पक्राउपछि ओलीलाई त्रिवि शिक्षण अस्पतालमा राखिएको छ। उनको स्वास्थ्य अवस्था थप गम्भीर बन्दै गएको अस्पतालले जनाएको छ। लेखकलाई भने २ नम्बर गणको प्रहरी हिरासतमा राखिएको छ।
प्रतिक्रिया