युनिकोड
मध्यपूर्वमा देखिएको तनावका कारण नेपाल एयरलाइन्स र हिमालय एयरलाइन्सका दोहा र दुबईका उडान रद्द गरिएका छन्।
नेपाल एयरलाइन्सले शनिबार साँझ सूचना प्रकाशित गरी मध्यपूर्वको तनावका कारण आज र भोलिका उडान रद्द गरिएको जनाएको छ। काठमाडौँबाट कतारको दोहा र यूएईको दुबईका लागि हुने नेपाल एयरलाइन्सका फागुन १६ र १७ गतेका उडान रद्द गरिएका हुन्।
मध्यपूर्वको अवस्था हेरेर उडानबारे जानकारी गराइने नेपाल एयरलाइन्सले जनाएको छ। उडान सम्बन्धी जानकारी सम्बन्धित यात्रुलाई इमलेमाफर्त पनि गराइने सूचनामा उल्लेख छ।
त्यस्तै, हिमालय एयरलाइन्सले पनि दुबई, दमाम र दोहाका उडान रद्द गरिएको जनाएको छ। शनिबार साँझ हिमालय एयरलाइन्सले जारी गरेको सूचनामा अर्को सूचना भएसम्मका लागि उडान रद्द गरिएको उल्लेख छ।
अमेरिका र इजरायले इरानमा शनिबार सैन्य आक्रमण गरेको छ। त्यसको जवाफमा इरानले पनि मध्यपूर्वमा रहेका अमेरिकी सैन्य अखडामा आक्रमण गरेको छ। जसले गर्दा कतार र यूएईले हवाई उडान बन्द गरेको छ।
प्रतिक्रिया