युनिकोड
पार्टीको सचिवालय र स्थायी समिति बैठकको पूर्वसन्ध्यामा प्रधानमन्त्री केपी शर्मा ओलीले नेकपाका अन्य शीर्ष नेताहरुसँग परामर्श तीब्र पारेका छन्।
नेकपा अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपालसँग मंगलबार बिहान भेट गरेका प्रधानमन्त्री ओलीले अर्का वरिष्ठ नेता झलनाथ खनालसँग बालुवाटारमा छलफल गरिरहेका छन्।
मंगबार दिउँसो १ बजेदेखि ओली र खनालबीच एक्ला एक्लै वार्ता भइरहेको बालुवाटार स्रोतले जनाएको छ।
नेकपाको बुधबार सचिवालय र बिहीबार स्थायी समिति बैठक तोकिएको छ।
स्थायी समितिको बैठक र समसामयिक राजनीतिक परिस्थितिबारे छलफल गर्न दुई नेताबीचको बैठक तय भएको स्रोतले जनाएको छ।
‘स्थायी समितिको बैठक र राष्ट्रिय राजनीतिको बारेमा छलफल गरौं भनेर प्रधानमन्त्रीले बोलाउनुभएको छ,’ स्रोतले भन्यो, ‘उहाँहरु अहिले एक्लाएक्लै वार्तामा हुनुहुन्छ।’
प्रधानमन्त्री ओलीले मंगलबार बिहान अध्यक्ष प्रचण्ड र नेपालसँग वार्ता गरेका थिए।
स्थायी समितिको बैठकको लागि प्रतिवेदन लेखनको जिम्मेवारी प्रचण्डले पाएका छन्। सोमबार दिउँसो पनि प्रधानमन्त्री ओली र प्रचण्डबीच बालुवाटारमा छलफल भएको थियो।
प्रतिक्रिया