माओवादी सांसद पाण्डेको प्रश्न– नागरिकता ऐनमा सेरोगेसीको विषय कसरी समेटिन्छ ?

नेकपा (माओवादी केन्द्र) का प्रमुख सचेतक हितराज पाण्डेले नागरिकता सम्बन्धी विधेयकमा सेरोगेसीको विषय कसरी सम्बोधन गर्ने भन्दै सरकारसँग प्रश्न गरेका छन्।

मंगलबारको राज्य व्यवस्था तथा सुशासन समितिको बैठकमा बोल्दै उनले आधुनिकताको विकाससँगै सेरोगेसीको चलन बढ्दै गइहेको उल्लेख गरे।

‘नागरिकताको कुरा गर्दा मेरो दिमागमा एउटा कुरा आएको छ, यो सरकारले हल कसरी गर्छ भन्ने हो,’ पाण्डेले भने, ‘अहिले विज्ञानले विकास गर्दागर्दै सेरोगेसी मदरको कुरा आउँछ। सेरोगेसीको समस्या नागरिकतामा कसरी समेट्ने। त्यो नहुँदा त अहिले असजिलो परिरहेको छ। यो सेरोगेसीको कुरा पनि आइसक्यो अब त। विज्ञानले विकास गरिसक्यो। यो पनि नागरिकताको एउटा समस्या हो। यो कुरालाई कसरी समाधान गर्ने हो? नेपाल सरकारले कसरी सोचेको छ?’

प्रमुख सचेतक पाण्डेले नागरिकतासम्बन्धी विधेयकमा व्यापक छलफल गर्न जरुरी रहेकोमा जोड दिए।