७ पटक शिक्षकको सुविधा बढाएको एमालेलाई बदनाम गर्ने प्रयास भइरहेको छ : पोखरेल

सत्तारुढ नेकपा एमालेका महासचिव शंकर पोखरेलले शिक्षक र कर्मचारीको तलव ७ पटकसम्म बढाएको दाबी गरेका छन्।

बिहीबार एमालेले काठमाडौँमा आयोजना गरेको 'युथ सेलिब्रेसन' कार्यक्रमलाई सम्बोधन गर्दै उनले सधै शिक्षक र कर्मचारीका पक्षमा रहेको एमालेलाई अहिले बदनाम गर्ने प्रयास भएको समेत टिप्पणी गरे।

‘शिक्षकहरु र कर्मचारीहरुको तलव, सेवा वृद्धि कतिपटक भयो भनेर सोध्नुभयो भने कम्तिमा आठ पटक सुविधा वृद्धि भयो होला बहुदलीय व्यवस्था स्थापना पछाडि,’ पोखरेलले भने, ‘सात पटक त नेकपा एमालेले मात्रै सुविधा बढाउने काम गरेको छ।'

उनले थपे, 'आज एमाले शिक्षक विरोधी भनेर प्रचार गर्न खोजिँदैछ। एमाले त कर्मचारी विरोधी। जसले सधै शिक्षकका पक्षमा, कर्मचारीका पक्षमा, पेशाकर्मीका पक्षमा काम गरेको छ। त्यो पार्टीलाई बदनाम गर्ने प्रयास भइरहेको छ।’

उनले यसप्रति एमाले युवाहरुलाई सेचत र होसियार हुन समेत आग्रह गरे।