संवैधानिक नियुक्ति विवादमा भोलि पनि निरन्तर सुनुवाइ

विभिन्न संवैधानिक निकायका ५२ पदाधिकारीको नियुक्ति विवादमा भोलि (सोमबार) पनि निरन्तर सुनुवाइ हुने भएको छ।

आज पाँचौँ दिन पनि सुनुवाइ नसकिएपछि भोलि नै पनि सुनुवाइ हुने गरी हेर्दाहेर्दैमा राखिएको सर्वोच्च प्रशासन अदालत प्रशासनले जनाएको छ।

चार वर्ष अघि २ खेपमा गरी नियुक्त भएका ५२ पदाधिकारी जोडिएको यस विवादमा सर्वोच्चको संवैधानिक इजलासमा गत माघ ३० बाट सुनुवाइ चलिरहेको छ।

सरकारका तर्फबाट महान्यायाधिवक्ता रमेश बडालले दिनभर बहस गरे। उनको बहस अझै सकिएको छैन। अरू सरकारी वकिलको पनि बहस बाँकी नै छ।

यसअघि निवेदकका तर्फबाट भने बहस सकिइसकेको छ।

संवैधानिक पदाधिकारीहरूको तर्फबाट बहस बाँकी नै छ।

• संवैधानिक नियुक्ति विवाद टुंग्याउन कस्सिए प्रधानन्यायाधीश, बुधबार पनि नपर्खी आइतबारै राखियो पेसी

चार वर्षअघि केपी शर्मा ओली प्रधानमन्त्री हुँदा दुईपटक गरी ५२ जनालाई अख्तियासहित विभिन्न संवैधानिक आयोगमा नियुक्ति गरिएको थियो। ती नियुक्ति गैरकानुनी रहेको दाबी गरी अधिवक्ता ओमप्रकाश अर्यालले २०७७ पुस १ गते पहिलो रिट निवेदन दायर गरेका थिए। त्योसहित अरू १४ वटा निवेदन यही विषयमा परेका छन्।

संवैधानिक इजलासमा प्रधानन्यायाधीश प्रकाशमानसिंह राउत तथा न्यायाधीशहरू सपना प्रधान मल्ल, मनोजकुमार शर्मा, कुमार चुडाल र नहकुल सुवेदी छन्।