युनिकोड
स्वास्थ्य तथा जनसङ्ख्यामन्त्री मोहनबहादुर बस्नेतले चिकित्सा शिक्षा ऐन संशोधनको प्रक्रियामा सरकार लागेको बताएका छन्।
सोमबार बिहान चितवनमा पत्रकारसँगको कुराकानीमा मन्त्री बस्नेतले ऐन संशोधनको लागि मन्त्रिपरिषद्मा छलफल भइरहेको जानकारी दिए।
चिकित्सा शिक्षा ऐनको विद्यमान व्यवस्थाले नेपालमा मेडिकल शिक्षा जुन ढङ्गले अघि बढ्नुपर्ने हो त्यो ढङ्गले अघि बढ्न नसकेको उनले बताए।
‘ऐन संशोधनका विषयमा प्रधानमन्त्री ज्यू तयार हुनुहुन्छ। क्याबिनेटमा समेत यसका विषयमा छलफल अब सुरु हुन्छ,’ उनले भने। अहिलेसम्म ऐन संशोधनका विषयमा दुईपटकसम्म बैठक भइसकेको र संशोधनको प्रक्रियामा अघि बढेको उनले बताए।
चिकित्सा शिक्षा ऐनका कारण देशमा आगामी पाँच वर्षमा चिकित्सक तथा स्वास्थ्य प्राविधिकको समस्या हुने देखिएकाले संशोधन गर्न लागिएको बस्नेतको भनाई छ। चिकित्सा क्षेत्रमा २२ वर्षअघिभन्दा कम दरबन्दीले काम भइरहेको चर्चा गर्दै उनले यसलाई थप गरेर अघि बढ्नुपर्नेमा जोड दिए।
‘कुनै एक जना व्यक्तिले अनशन बस्छु भन्दैमा देशको हितका लागि हुने काममा राज्यले खुट्टा कमाउनु हुँदैन र कमाउँदैन,’ उनले भने, ‘भएका राम्रा कुराको कार्यान्वयन र नराम्रा कुराको सुधार एवं संशोधन गरेर अघि बढ्छौँ।’
विद्यमान ऐनलाई संशोधन गरेर गुणस्तरीय शिक्षा र शुल्क निर्धारण गर्ने विषयमा कार्यविधि बनाएर सरकारले अनुगमन गर्ने उनले बताए। अहिलेको शिक्षा नीति केही खुकुलो हुने उनले बताए।
सरकारले अहिले एक सयदेखि तीन सय शय्या भएका अस्पताललाई नर्सिङ र प्यारामेडिकस पढाउन दिने र तीन सय शय्या भन्दा माथि भएका अस्पताललाई एमबीबीएस पढाउन दिनेगरी खुकुलो पार्न लागेको जानकारी उनले दिए।
सुधार गर्नुपर्ने ठाउँमा सुधार गरेर मेडिकल शिक्षा सञ्चालन गरिने मन्त्री बस्नेतको भनाई थियो।
एक फरक प्रसङ्गमा मन्त्री बस्नेतले सूर्तीजन्य पदार्थमा लाइदै आइएको कर अब स्वास्थ्य मन्त्रालय मातहतमा ल्याउने गरी काम भइरहेको पनि जानकारी दिए। त्यसबाट उठेको रकमले अस्पतालको गुणस्तर वृद्धि र कर्मचारी व्यवस्थापन गरिने उनको भनाई थियो। रासस
प्रतिक्रिया