युनिकोड
नेकपा माओवादी माओवादी केन्द्रका अध्यक्ष पुष्पकमल दाहाल ‘प्रचण्ड’ ले तत्काल समाजवादी केन्द्र नबन्ने दाबी गरेका छन्।
माओवादी केन्द्रनिकट पत्रकारको संगठन प्रेस सेन्टरको दोस्रो केन्द्रीय समिति बैठक सम्बोधन गर्दै शुक्रबार प्रचण्डले तत्काल समाजवादी केन्द्र नबन्ने दाबी गरेका हुन्।
उनले समाजवादी केन्द्र निर्माणका लागि छलफल नै नभएकोसमेत जिकिर गरे। ‘तत्काल समाजवादी केन्द्र बन्दै छैन,’ अध्यक्ष प्रचण्डले भने, ‘हाम्रो छलफलमा त्यो कुरा भएको छैन।’
उनले आगामी प्रदेशिक र संघीय निर्वाचनमा एउटै चुनाव चिन्हमा लड्ने कुरा भने भएको स्वीकार गरे। ‘चुनावी मोर्चा वा चुनावी तालमेल हुन सक्छ,’ प्रचण्डले भने, ‘एउटै चुनाव चिन्हमा लड्नेसम्म कुरा भएको छ।’
तर केही दिनअघि माओवादी केन्द्रका नेता वर्षमान पुनले कांग्रेससँगको गठबन्धन के हुन्छ प्रष्ट नभए पनि समाजवादी केन्द्र बन्ने निश्चित भएको प्रतिक्रिया दिएका थिए।
‘माओवादी केन्द्र, नेकपा एकीकृत समाजवादी, जनता समाजवादी पार्टी, बाबुराम भट्टराई र वामदेव गौतमबीच समाजवादी केन्द्र बनाउने सहमति भइसकेको छ,’ पुनले केही दिनअघि नेपालखबरसँग भनेका थिए, ‘चुनावमा हामी मोर्चा बनाएरै जान्छौँ।’
प्रचण्डले पाँच दलीय गठबन्धन चुनावसम्मै जाने पनि बताएका छन्। 'यो गठबन्धन यो चुनावमा मात्रै होइन, पछिसम्म जान्छ। यही गठबन्धनले शान्ति प्रकृया टुंगो लगाउँछ', उनले भने, 'स्थानीय निर्वाचनको परिणाम राम्रो आएको छैन। कसैले एकलौटी गर्नु जरुरी छैन। त्यसमा काङ्ग्रेस पनि अलिक तयार हुनुपर्छ।'
उनले अमेरिकी सैन्य कार्यक्रमम एसपीपीबारे अमेरिकालाई आजै पत्र गइसकेको पनि जिकिर गरेका छन्।
प्रतिक्रिया