कर्णालीमा उपनिर्वाचनको सरगर्मी

आगामी मंसिर १४ गते हुने उपनिर्वाचनका लागि कर्णालीका दुई जिल्लामा तयारी तीव्र पारिएको छ। हिमाली जिल्ला हुम्लाको खार्पुनाथ गाउँपालिकामा उपाध्यक्ष तथा पहाडी जिल्ला सल्यानको कुमाख गाउँपालिका–५ मा वडाध्यक्ष पदका लागि उपनिर्वाचन हुन लागेको हो।

उम्मेदवार मनोनयनको मिति नजिकिँदै गर्दा राजनीतिक दलहरु, निर्वाचन कार्यालय र सुरक्षा निकायहरु निर्वाचन लक्षित रणनीति बनाउन व्यस्त छन्। निर्वाचन आयोगले उपनिर्वाचनका लागि यही कात्तिक २१ गते उम्मेदवार मनोनयनको मिति तोकेको छ। दुवै जिल्लामा प्रमुख दल नेपाल कम्युनिष्ट पार्टी (नेकपा) र नेपाली कांग्रेले आइतबारसम्म उम्मेदवारको टुंगो लगाउने गरी गृहकार्य गरिरहेको छ।

हुम्ला कांग्रेस सभापति जयपति रोकायाले वडा कार्यसमितिलाई आकांक्षीको नामावली पठाउन अनुरोध गरिएको बताए। कांग्रेसले उम्मेदवार छनोटका लागि स्थानीयस्तरमा मोहन सिंह र कैलाश भण्डारी नेतृत्वमा दुई टोली परिचालन गरेको छ। ‘वडा, गाउँपालिका हुँदै जिल्ला कार्यसमितिमा उम्मेदवारको नामावली पठाउन आग्रह गरेका छौँ’, सभापति रोकायाले भने, ‘सम्भवतः आइतबार बस्ने जिल्ला कार्यसमिति बैठकबाट उपाध्यक्षको टुंगो लगाउँछौँ।’ नेकपाले पनि आकांक्षीको नाम सिफारिश गर्न स्थानीय कमिटीलाई अनुरोध गरेको छ।

खार्पुनाथ गाउँपालिका उपाध्यक्ष सिन्धु हमाल शाहीको यही असार ३ गते जिप दुर्घटनामा परी निधन भएको थियो। उनी नेपाली कांग्रेसबाट निर्वाचित थिए। यहाँका पाँच वडामा गरी तीन हजार २८७ मतदाता छन्। खार्पुनाथमा सत्तारुढ नेकपा र कांग्रेसबीच नै मुख्य प्रतिष्पर्धा हुने बताइएको छ।

हुम्लाका प्रमुख जिल्ला अधिकारी विनिता भट्टराईले खार्पुनाथ र आसपासको सुरक्षा व्यवस्था प्रभावकारी बनाउन आवश्यक सुरक्षा रणनीति बनाइने बताए। ‘यहाँका पाँचवटै मतदात केन्द्रमा सुरक्षा मजबुत बनाउन जिल्ला सुरक्षा समितिले आवश्यक गृहकार्य गरिरहेको छ, थप प्रहरी जनशक्ति पनि मागेका छौँ, शान्तिपूर्ण तवरले निर्वाचन सम्पन्न गछौँ’ प्रजिअ भट्टराईले भने।

सल्यानमा पनि उपनिर्वाचनको माहोल शुरु भएको छ। कुमाख गाउँपालिका–५का वडाध्यक्ष हरिप्रकाश बुढाथोकी जिल्ला समन्वय समितिको उपप्रमुखमा चयन भएसँगै त्यहाँ उक्त पद रिक्त छ। बुढाथोकी तत्कालीन माओवादी केन्द्रबाट निर्वाचित भएका थिए। सल्यान नेकपाका अध्यक्ष गोविन्द पुनले आइतबार बस्ने जिल्ला पार्टीको सचिवालय बैठकले उम्मेदवारको टुंगो लगाउने बताए। उनले भने, ‘गाउँपालिका कमिटीले पठाउने तीन जना आकांक्षीमध्ये सम्भवतः आइतबार एक जनाको टुंगो लगाउँछौँ।’ जिल्ला प्रशासन कार्यालय सल्यान पनि उपनिर्वाचनलाई शान्तिपूर्ण रुपले सम्पन्न गर्न आवश्यक सुरक्षा व्यवस्थाको तयारीमा जुटिसकेको छ। यी दुवै जिल्लामा सुरक्षा निकायले यहाँ पनि प्रतिबन्धित विप्लव समूहलाई मध्यनजर गरी सुरक्षा रणनीति बनाइरहेका छन्। रासस