साफ च्याम्पियनसिपमा नेपाल : आफ्नै मैदानमा एक दिन मात्र तयारी गर्न पाएको टोली (फोटोफिचर)

घरेलु टोली नेपालले भुटानसँग खेल्दै साफ महिला च्याम्पियनसिप-२०२४ को सुरुवात गर्दै छ। त्रिपुरेश्वरस्थित दशरथ रंगशालामा हुने खेल साँझ साढे ५ बजे सुरु हुनेछ।

घरेलु टोली भए पनि नेपालले खेल हुने दशरथ रगंशालामा एक दिन मात्र अभ्यास गर्न पाएको थियो।

च्याम्पियनसिपमा आयोजक नेपाल, भुटानसँगै श्रीलंका र मालदिभ्स रहेको समुह बी मा परेको छ। सहज समूहमा परेको नेपालले सेमिफाइनलमा साफको सर्वाधिक उपाधि विजेता भारत र साविक विजेता बंगलादेशमध्ये एकलाई प्रतिद्वन्दी पाउने निश्चित छ।

साफ इतिहासमा नेपालले पहिलोपटक गत संस्करण भारतलाई सेमिफाइनलमा हराएको थियो। तर फाइनलमा भने बंगलादेशसँग पराजित भयो।

साफको सातौँ संस्करण जारी रहँदा नेपालले पाँचपटक फाइनल खेलेको छ। नेपालले सन् २०१६ बाहेकका हरेक संस्करणमा फाइनलमा खेलेर उपविजेतामै चित्ता बुझाएको छ। चारपटक भारतसँग र एकपटक बंगलादेशसँग पराजित हुँदै नेपालले साफको स्थायी उपविजेताको छवि बनाएको छ।

यसपटक छोटो तयारीमा नेपालले च्याम्पियनसिप खेल्न लागेको छ। करिब २ साताको तयारीमा नेपाल भुटानविरुद्ध मैदान उत्रँदै छ।