युनिकोड
नवनियुक्त प्रधानमन्त्री बालेन्द्र शाह (बालेन) को पुर्ख्यौली गाउँमा आज उत्सव मनाइएको छ।
महोत्तरीको एकडारा गाउँपालिका-१ स्थित पुर्ख्यौली गाउँ एकडारामा गाउँवासीले उत्सव मनाइएको हो।
एकडारा गाउँपालिकाका अध्यक्ष दीपनारायण मण्डलले शाह देशकै प्रमुख कार्यकारी पद (प्रधानमन्त्री) मा नियुक्त हुँदा जिल्लामै खुसीयाली मनाइएको बताए।
‘एकडारा-१ मात्र होइन, जिल्लावासीले नै खुसियाली साटासाट गर्दै उत्सव मनाइरहेका छन्’, उनले भने।
राष्ट्रपति रामचन्द्र पौडेलले शाहलाई आज प्रधानमन्त्रीमा नियुक्त गरेसँगै एकडारावासी एकापसमा रङ, अबिर दलेर, फूलमाला लगाएर, एकापसमा अँगालो मारेर र शुभकामना तथा बधाई आदानप्रदान गरिरहेका एकडारा-१ का वडाध्यक्ष मनोज मण्डलले बताए।
वडाध्यक्ष मण्डलका अनुसार एकडाराको नाम इतिहासमा दर्ज भएको भन्दै पुर्ख्यौली गाउँमा उत्सव मनाइएको छ।
‘आज एकडारावासी घरघरमा मीठो पकवान पकाएर खाने, खुवाउने गर्दै छन्, एकडारा गाउँभरि र बटुवालाई विभिन्न लड्डु, पेडा तथा मिठाई बाँड्ने काम भइरहेको छ’, उनले भने।
प्रधानमन्त्री शाहको घर एकडारा-१ मा पर्छ।
उक्त घरमा हाल एकडारा गाउँपालिकाको कार्यालय सञ्चालनमा छ।
आज साँझ एकडाराको घरघरमा दीपावली मनाउने कार्यक्रम रहेको गाउँपालिकाका अध्यक्ष मण्डलले बताए। रासस
प्रतिक्रिया