युनिकोड
भुक्तानीको माग गर्दै उपभोक्ता समितिले मधेश प्रदेशको अर्थ मन्त्रालय घेराउ गरेको छ ।
प्रदेश सरकारको भौतिक पूर्वाधार विकास मन्त्रालय लगायतका मन्त्रालयहरुको विभिन्न योजनाका साथै विकास निर्माणको काम गरे पनि भुक्तानी नगरिएको भन्दै उपभोक्ता समितिले मन्त्रालय घेराउ गर्दै प्रदर्शन गरेको हो ।
काम गरेको महिनौँ बितिसक्दा समेत भुक्तानी नपाएकोले यथाशीघ्र आफूहरुको भुक्तानी हुनुपर्ने माग गर्दै समितिका पदाधिकारीहरुले नारा जुलुससहित प्रदर्शन गरेका हुन् ।
धनुषाको धनौजी गाउँपालिकामा पीसीसी ढलानको काम गरेका सोनु निधिले आर्थिक वर्ष २०७८/७९ मा विभिन्न मन्त्रालयअन्तर्गतको ४ दर्जन विकास निर्माणको काम गरेको महिनौँ बितिसक्दा पनि भुक्तानी नपाएकाले आज बाध्य भएर मन्त्रालय घेराउ गरेको बताए ।
उनले आफूहरुले काम सम्पन्न गरेको महिनौं बितिसकेको अवस्थामा अब बैंकको ब्याज तिर्नसमेत समस्या भइरहे पनि भुक्तानीका लागि प्रदेश सरकारले चासो नदेखाएको गुनासो गरे । बैंकको ब्याज महिनाको ८० हजार तिर्न परिरहेको उनले सुनाए । भुक्तानीको विषयमा प्रमुख सचिवले कुरा गर्नसमेत नमानेको उनको भनाइ छ ।
उनीहरुले मुख्यमन्त्री कार्यालयमा तालाबन्दी गर्न खोज्दा प्रहरीले रोकेको थियो ।
यता, चुनावको कारण केही महिना अगाडिदेखि नै आचारसंहिता लागिसकेको अवस्थामा उपभोक्ता समितिको भुक्तानी गर्न नसकेको सम्बन्धित मन्त्रालयहरुले जानकारी दिएको छ ।
भौतिक पूर्वाधार विकास मन्त्रालयको ३२ वटा योजनाको करोडौं रकम भुक्तानी गर्न बाँकी रहेको छ । यसमा अन्य मन्त्रालयहरुमार्फत गरिएका कामहरु समेत रहेका छन् । अन्य मन्त्रालयहरुको पनि विभिन्न उपभोक्ता समितिहरुको करिव १ अर्ब भुक्तानी गर्न बाँकी छ ।
यसअघि, आर्थिक वर्ष २०७५/०७६ मा पनि प्रदेश सरकारको योजनाको बाँकी भुक्तानी नदिएको भन्दै उपभोक्ता समितिले मुख्यमन्त्री लालबाबु राउत लगायत केही मन्त्रीको तस्बिर अंकित व्यानरमा जुत्ता प्रहार गरेको थियो ।
प्रतिक्रिया