भारतको राजस्थानमा आगामी विधानसभा चुनाव हुनुअघि कांग्रेसको अशोक गहलोत सरकारका मन्त्री राजेन्द्र गुढालाई बर्खास्त गरिएको छ।
मुख्यमन्त्री अशोक गहलोतले शुक्रबार साँझ मन्त्रिपरिषद्मा राज्यमन्त्री राजेन्द्र सिंह गुढालाई बर्खास्त गर्न राज्यपाल कलराज मिश्रलाई सिफारिस गरेका थिए। राज्यपालले तुरुन्तै स्वीकार गरी मन्त्री गुढालाई बर्खास्त गरेका हुन्।
मन्त्री राजेन्द्र गुढाले आफ्नै सरकारविरुद्ध पटकपटक बयान दिइरहेका थिए।
उनले शुक्रबार विधानसभामा भने, ‘के सत्य हो भने हामी राजस्थानमा महिलाको सुरक्षा गर्न असफल भयौँ।’
राजेन्द्र गुढाले मणिपुर घटनालाई राजस्थानसँग जोडेर आफ्नै अशोक गहलोत सरकारलाई कठघरामा उभ्याएका छन्।
उनले भनेका थिए, ‘राजस्थानमा जसरी महिलाविरुद्ध अत्याचार बढेको छ, यस्तो अवस्थामा मणिपुरको कुरा गर्नुको सट्टा हामीले आफ्नै आँगनमा हेर्नुपर्छ।’
राजेन्द्र गुढा उदयपुरवती सिटबाट बहुजन समाज पार्टी (बसपा) को टिकटमा विजयी भएका हुन्। त्यसपछि बसपाका सबै ६ विधायकसहित कांग्रेसको समर्थनमा उनी अशोक गहलोत सरकारमा मन्त्री बनेका थिए।
Shares
प्रतिक्रिया