युनिकोड
तुलसी घिमिरेको निर्देशन रहेको फिल्म ‘पहाड’ लाई विशेष शोमा रुचाइएको छ। सोमबार बेलुकी आयोजना गरिएको विशेष प्रदर्शनीमा फिल्म हेर्न पुगेका पाहुनाले यो चलचित्रको प्रशंसा गरेका छन्।
सङ्गीतकार शम्भुजित बाँस्कोटाले फिल्मले समग्र देशको अवस्थालाई चित्रण गरेको बताए।
चलचित्र विकास बोर्डका अध्यक्ष दिनेश डिसीले तुलसी घिमिरेका पहिलेका फिल्म झैँ मनोरन्जनसँगै सन्देश बोकेको ‘पहाड' स-परिवार हेर्न मिल्ने फिल्म बनेको प्रतिक्रिया दिए। उनले भने, ‘तुलसी दाईले फिल्ममार्फत दिनभएको संदेश प्रसंशनीय छ । फिल्ममा कलाकारको अभिनयसँगै पहाडमार्फत समग्र देशको अवस्थालाई चित्रण गरिएको छ । यो कथा पहाडको भएता पनि समग्र देश नै फिल्ममा देखिएको छ । युवालाई आफ्नो देश, गाउँ र पहाड फर्किन फिल्मले प्रेरित गर्छ।’
‘हामीले फिल्ममार्फत भन्न खोजेको कुरालाई दर्शकले राम्रोसँग बुझ्नुभएको छ, अधिकाँस दर्शकले यसलाई आफ्नै कथा भन्नुभएको छ । मैले जे सन्देश दिन खोजेको थिएँ, त्यो दर्शकसम्म पुगेको छ । फिल्म हेर्न आउनु भएका दर्शक सन्तुष्ट भएर फर्किनु भएको छ,’उनले भने।
बेरोजगारी, मानवविहीन बन्दै गएको पहाड र पानी अभावजस्ता विषयमा आधारित फिल्मले अहिलेको समसामयिक विषयलाई पर्दामार्फत दर्शकसम्म पुर्याएको बताए।
अभिनेता विपिन कार्कीले फिल्मले पाएको प्रतिक्रियाले आफूसहित टिम उत्साहित रहेको बताए। ‘यो फिल्मप्रति दर्शकको प्रतिक्रिया हेर्दा आगामी दिनमा दर्शकको भीड अझ बढ्नेमा आशावादी छु । यसले नेपाली माटोको मौलिक कथा प्रस्तुत गरेको छ । फिल्म हेर्नेले पक्कै अन्यलाई सिफारिस गरेर फिल्म हेर्न हलसम्म पठाउनु हुनेछ’, उनले भने ।
अभिनेता रवीन्द्र सिंह बानियाँले तुलसी घिमिरे जस्तो निर्देशकसँग काम गर्न पाउनु गौरवको विषय रहेको बताए। ‘म निर्देशक घिमिरेको फिल्महरू हेर्दै हुर्किएको पुस्ता परे, उहाँले नेपाली फिल्मलाई दिनुभएको योगदानको बारेमा शब्दमा वर्णन गर्न सकिदैन। मेरो इच्छा थियो उहाँसँग काम गर्ने, यो पुरा भएको छ। मेरो कलाकारिता यात्रामा यो सहकार्य अमुल्य छ’, उनले भने ।
यस फिल्ममा मदनकृष्ण श्रेष्ठ, विपिन कार्की, रविन्द्र सिंह बानियाँ, सुनिल थापा, रेनुनाथ योगी, उमा गिरी, अरुण क्षेत्री तथा नव अभिनेत्री पञ्चमी घिमिरेको अभिनय रहेको छ। फिल्ममा युवा जनशक्ति विदेश पलायन हुँदा खाली बन्दै गएका पहाडी क्षेत्र र त्यसले निम्त्याएको सामाजिक तथा आर्थिक समस्यालाई चित्रण गरिएको छ ।
निर्देशक घिमिरेले यसअघि ‘बलिदान’मा काम गरेका मदनकृष्ण श्रेष्ठ तथा ‘चिनो’मा काम गरेका शिव श्रेष्ठ र सुनिल थापालाई पनि ‘पहाड’मा समेटेका छन् । फिल्मको छायांकन प्रमोद प्रधानले गरेका हुन्।
भाग्यरत्न फिल्म्स प्रा.लि. को ब्यानरमा निर्माण भएको फिल्म ‘पहाड’मार्फत निर्देशक घिमिरेकी कान्छी छोरी पञ्चमी घिमिरेले अभिनेत्रीका रूपमा डेब्यु गरेकी छन्। साथै, प्राविधिक टिममा निर्देशककी जेठी छोरी भावना घिमिरेले प्रोडक्सन डिजाइनरको जिम्मेवारी सम्हालेकी छन्। फिल्ममा रञ्जित सिंह गजमेर संगीत निर्देशक रहेका छन्।
प्रतिक्रिया