युनिकोड
नायिका शिल्पा पोखरेलले निर्देशक एवं पति छवि ओझाविरुद्ध घरेलु हिंसा गरेको भन्दै प्रहरीमा उजुरी दिएकी छिन्।
महानगरिय प्रहरी परिसर काठमाडौं टेकुमा उनले शान्ति, सुरक्षाको माग गर्दै उजुरी दिएकी हुन्। यो जोडीले २०७३ सालमा गुपचुपरुपमा बिहे गरेको थियो। त्यसपछि दुवैले सम्बन्ध राम्रो रहेको सार्वजनिक रुपमै बताउँदै आएका थिए। एकाएक शिल्पाले छविविरुद्ध उजुरी दिएपछि यसले नयाँ तरंग ल्याइदिएको छ।
परिसरका डिएसपी होविन्द्र बोगटीका अनुसार शिल्पाले उजुरी दिएपछि मंगलबार दुई पक्षबीच सहमतिको प्रयासस्वरुप छलफल भएको थियो। सहमति भने जुट्न सकेन। डिएसपी बोगटीले नेपालखबरसँग भने, ‘शिल्पाजीले आफू असुरक्षित रहेको भन्दै उजुरी दिनुभएको छ। मंगलबार दुवैबीच छलफल भयो तर सहमति जुट्न सकेन। बुधबार छविजी स्वास्थ्य अवस्था ठिक नभएको भन्दै छलफलमा आउनुभएन।’ स्रोतकाअनुसार शिल्पाले छविसँग डिभोर्स गर्न खोजेको बुझिएको छ।
शिल्पाले ‘हवल्दार सुन्तली’, ‘लज्जा’, ‘आगो’, ‘मंगलम्’मा अभिनय गरेकी छिन्। उनलाई छविले नै नायिका बनाएका हुन्।
श्रीमतीसँग गर्ने व्यवहारलाई लिएर छविको पृष्ठभूमि गडबड छ। शिल्पा उनकी चौथी श्रीमती हुन्।
प्रतिक्रिया