युनिकोड
पोखराको मेयरमा नेकपा एकीकृत समाजवादीका धनराज आचार्य र उपमेयरमा एमालेकी मञ्जुदेवी गुरुङ विजयी हुने निश्चित भएको छ।
पोखरामा खसेको १ लाख ४३ हजार २२६ मतमध्ये १ लाख ३९ हजार ४११ मत गनिसक्दा दुवैले पाएको अग्रताले उनीहरु विजयी हुने निश्चित भएको हो।
अब पोखरामा ३ हजार ८१५ मत गन्न बाँकी छ। यस्तोमा धनराजले ५७ हजार ७२ र उनका प्रतिस्पर्धी कृष्ण थापाले ५१ हजार ५८७ मत प्राप्त गरेका छन्।
जुन ५ हजार ४८५ मतको अन्तर हो। हाल गणना भइरहेको वडा नम्बर २२,३२ र ३३ बाट सबै मत कृष्ण थापाको पक्षमा गए पनि धनराज विजयी हुन्छन्। तर, ती वडामा पनि धनराजले अग्रता लिइरहेका छन्। वडा नम्बर ३३ त धनराजको आफ्नै वडा हो।
उपमेयरमा पनि मञ्जुदेवी गुरुङले ५९ हजार ७० मत र कांग्रेसकी कोपिला रानाभाटले ५५ हजार ६० मत प्राप्त गरेका छन्।
यहाँ ३ हजार ९९० मतको अन्तर छ। गन्न बाँकी ३ हजार ८१५ मत नै कोपिलाले पाउँदा पनि विजयी हुने सम्भावना अन्त्य भएको छ।
सबै मत गनिसकेपछि मात्रै आयोगले आधिकारिक घोषणा विजेता घोषणा गर्नेछ।
यद्यपि, एमालेले वडा नम्बर ३१ र १८ को पुनः मतगणनाको माग राख्दै प्रतिनिधि नपठाएपछि गणना अवरुद्ध भएको छ।
प्रतिक्रिया