युनिकोड
बागमती प्रदेशमा लम्पी स्किन रोग विरुद्धको सप्ताहव्यापी खोप अभियानमा आज पहिलो दिन ४ हजार ४ सय ६७ गाईभैंसीहरुमा खोप लागइएको छ।
प्रदेशको १३ वटै जिल्लामा गरी एक दिनमा सो परिणामको खोप लगाइएको प्रदेशको कृषि तथा पशुपन्छी विकास मन्त्रालयका सूचना अधिकारी अनुप अधिकारीले जानकारी दिए।
उनका अनुसार आज सबैभन्दा धेरै खोप चितवनमा १ हजार १६ पशुवस्तुमा खोप लगाएको छ भने सबैभन्दा कम रसुवामा ७५ गाईभैंसीमा यो रोग विरुद्धको खोप लगाइएको छ।
यसैगरी सिन्धुलीमा ३ सय ५३, काठमाडौंमा ३ सय ८९, ललितपुरमा १ सय १९, भक्तपुरमा २ सय ७, धादिङमा १ सय ८१ गाईभैंसीमा खोप लगाइएको मन्त्रालयले जनाएको छ।
यस्तै, काभ्रेमा ६ सय ९८, नुवाकोटमा १ सय ९८, रामेछापमा २ सय ४२, सिन्धुपाल्चोक २ सय ७५ र मकवानपुरमा ७ सय २४ पशुवस्तुमा खोप लगाइएको मन्त्रालयले जनाएको छ। दोलखामा भने भोलिदेखि खोप लगाउन सुरु गरिने भएको छ।
कृषि मन्त्रालयको पछिल्लो तथ्यांक अनुसार १ लाख १० हजार ४ सय ४० गाईवस्तुमा यो रोगको संक्रमण देखा परेको छ। जसमध्ये ६ हजार २ सय ९१ पशुको मृत्यु भएको छ। माहामारीको रुपमा फैलिएको लम्पी स्किन डिडिज् नियन्त्रण गर्ने उदेश्यले मन्त्रालयले आज देखि सप्ताहव्यापी रुपमा खोप अभियान थालनी गरेको हो।
प्रदेशका ८ वटा भेटेरिनरी अस्पताल तथा पशु सेवा विज्ञ केन्द्र मार्फत खोप लागाउने खोपकर्ता नियुक्त गरिएको छ। कुल १ सय ४६ जना खोपकर्ताले १३ वटै जिल्लाका लम्पी स्किन प्रभावित स्थानीय तहका पशुवस्तुमा खोप लगाउने छन् । यो अभियान अन्र्तगत ५० हजार पशुवस्तुमा खोप लगाउने मन्त्रालयको लक्ष छ।
प्रतिक्रिया