प्रधानमन्त्री कप महिला टी-२० क्रिकेट प्रतियोगिताको उपाधि प्रदेश १ ले जितेको छ।
राष्ट्रिय खेलाडीले भरिएको एपीएफ क्लबलाई आइतबार सम्पन्न फाइनलमा ६ रनले पराजित गर्दै प्रदेश १ च्याम्पियन बनेको हो।
दाङको लमहीस्थित देउखुरी क्रिकेट मैदानमा प्रदेश १ ले दिएको १०६ रनको लक्ष्य पछ्याएको एपीएफले निर्धारित २० ओभरमा ७ विकेट गुमाएर ९९ रनमा समेटिएको थियो।
एपीएफका लागि ममता चौधरीले ३४ र करुणा भण्डारीले २६ रन जोडिन। त्यसबाहेक ज्योती पाण्डेले १४, इन्दु बर्माले ७, सरिता मगरले ६ रन जोडिन।
प्रदेश १ की रुविना क्षेत्री र अलिसा खडियाले २-२ तथा संगिता राईले एक विकेट लिइन।
त्यसअघि टस जितेर पहिले ब्याटिङ गरेको प्रदेश १ ले निर्धारित २० ओभरमा ५ विकेट गुमाएर १०५ रन बनाएको थियो।
उसका अप्सरी बेगमले ४५ बलमा ५ चौकासहित ३४, काजोल श्रेष्ठले २९ तथा कप्तान रुविना क्षेत्रीले १८ रन जोडिन।
एपीएफकी कप्तान सिता रानामगरले तीन तथा करुणा भण्डारीले एक विकेट लिइन।
जितसँगै प्रदेश १ ले पाँच लाख रुपैयाँ हात पारेको छ भने एपीएफले २ लाख रुपैयाँ पाएको छ।
प्रतिक्रिया