लुम्बिनी प्रदेशलाई पराजित गर्दै सशस्त्र प्रहरीको एपीएफ क्लब प्रधानमन्त्री कप महिला राष्ट्रिय क्रिकेट प्रतियोगिताको समूह ‘ए’को विजेता बनेको छ।
आज सोमबार भएको समुह ए अन्तिम खेलमा एपीएफले लुम्बिनी प्रदेशलाई ६१ रनले पराजित गर्दै समुह विजेता बन्दै अन्तिम ४ मा पुगेको हो।
एपीएफले अब फाइनल प्रवेशका लागि प्रतियोगिताको पहिलो सेमिफाइनलमा समुह बी को उपविजेतासँग खेल्नेछ। दोस्रो सेमिफाइनलमा लुम्बिनी प्रदेशले समुह ‘बी’को विजेतासँग प्रतिस्पर्धा गर्नेछ।
एपीएफले दिएको १ सय २३ रनको लक्ष्य पछ्याएको लुम्बिीनी प्रदेशले निधारित ओभरमा ७ विकेट गुमाउँदै ६१ रन मात्र जोड्न सक्यो।
लुम्बिनीलाई कम स्कोरमा रोक्न एपीएफका करुणा भण्डारीले २ तथा सोनु खड्का र रेखा रावलले समान १ विकेट लिए।
लक्ष्मी चौधरीले जोडेको ११ रन नै लुम्बिनीका लागि सर्वाधिक रह्यो। सरस्वती चौधरी १० रनमा नटआउट रहिन्। अन्य ७ ब्याट्स वुमनले दोहोरो अंकको स्कोर छुन सकेनन्।
त्यसअघि देउखुरी क्रिकेट मैदानमा टस जितेर पहिला ब्याटिङ रोजेको एपीएफले निर्धारित २० ओभरमा ४ विकेट गुमाउँदै १ सय २२ रनको योगफल तयार पारेको थियो।
एपीएफकी ओपनर ज्योति पान्डेले सर्वाधिक ४९ रनको योगदान दिइन्। राजमती ऐरी ११, इन्दु बर्मा २८ रनमा पवेलियन फर्के। ममता चौधरी ४ रनमा आउट हुँदा सरिता मगर १० र सोनु खड्का २ रनमा नटआउट रहे।
लुम्बिनीकी कप्तान नेरी थापाले २ तथा कृतिका मरासैनी र सरस्वती पुनले समान १ विकेट लिए ।
प्रतियोगितामा भोलिदेखि समूह ‘बी’का खेल सुरु हुनेछन्।
समूह ‘बी’को पहिलो खेलमा भोलि सुदूरपश्चिम प्रदेश र गण्डकी प्रदेश भिड्नेछन्। दोस्रो खेलमा वाग्मती प्रदेशले प्रदेश १ सँग खेल्नेछ।
Shares
प्रतिक्रिया