युनिकोड
टिप टप न्यु डायमन्ड युथ स्पोर्टस क्लब र नेपाल पुलिस क्लबले काठमाडौँमा सुरु नवौं केएनपी निरोलेक राष्ट्रिय महिला भलिबल प्रतियोगितामा विजय सुरुआत गरेका छन्।
त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको खेलमा साविक विजेता पुलिस क्लबले एपीएफ क्लबलाई ३-० को सोझो सेटमा पाखा लगाएको हो।
पुलिस क्लबले एपीएफलाई २५-२२, २५-२० र २५-२१ को सोझो सेटमा हराएको हो। आजै भएको प्रतियोगिताको उद्घाटन खेलमा न्यु डायमन्डले त्रिभुवन आर्मी क्लबलाई ३-० को सोझो सेटमा नै हराएको छ।
न्यु डायमन्डले आर्मीमाथि २५-१६,२५-१५ र २५-१७ को जित निकालेको हो। चार टोली सहभागी प्रतियोगितामा राउन्ड रोबिन लिगपछि शीर्ष दुई टोलीले फाइनल र पुछारमा दुई टोली तेस्रो स्थानका लागि खेल्नेछन्।
प्रतियोगिताको उपाधि विजेताले ५ लाख रुपैयाँ तथा उपविजेता टोलीले २ लाख ५० हजार रुपैयाँ प्राप्त गर्नेछन्। तेस्रो हुने टोलीले १ लाख २५ हजार र चौथो स्थानमा रहने टोलीले ६२ हजार ५ सय रुपैयाँ प्राप्त गर्नेछन्।
प्रतियोगिताको सर्वोत्कृष्ट खेलाडीले ५० हजार रुपैयाँ पाउनेछिन्। विधागततर्फ उत्कृष्ट हुने खेलाडीले जनही २५ हजार रुपैयाँ पाउनेछन्। हरेक खेलको प्लेयर अफ दि म्याचले १५ हजार रुपैयाँ पाउनेछिन्।
प्रतिक्रिया