युनिकोड
सुदूरपश्चिममा राष्ट्रियसभा निर्वाचनअन्तर्गत दुई पदमा चार जनाले मनोनयन दर्ता गराएका छन्।
नेपाली कांग्रेस र नेकपा एमालेको गठबन्धनबाट कांग्रेसका खम्मबहादुर खाती र एमालेकी लीलाकुमारी भण्डारीको मनोनयन दर्ता गरिएको छ।
‘अन्य’ क्लस्टरबाट उम्मेदवार बनेका कांग्रेसका खाती पूर्वमहान्यायाधीवक्ता हुन्। महिला क्लस्टरमा उम्मेदवार बनेकी भण्डारी माओवादी हुँदै एमाले प्रवेश गरेकी हुन्।
कांग्रेस र एमालेको गठबन्धनविरुद्ध नेपाली कम्युनिस्ट पार्टी (नेकपा)ले मनोनयन दर्ता गरेको छ।
नेकपाबाट अन्यतर्फ टीकाराम जैसी र महिलातर्फ रोजी बस्नेत सुनारको मनोनयन दर्ता गरिएको छ।
जैसी माओवादी र बस्नेत एकीकृत समाजवादी पृष्ठभूमिका हुन्।
एमालेका शारदादेवी भट्ट र नेपाली कम्युनिस्ट पार्टीका तारामान स्वारको पदावधि सकिएपछि रिक्त हुने दुई पदका लागि ४ जनाको उम्मेदवारी परेको हो।
रिक्त हुने पदपूर्ति गर्न ११ माघमा राष्ट्रिय सभा निर्वाचन हुँदैछ।
यसमा प्रदेशसभा सदस्यहरू, नगरप्रमुख र उपप्रमुखहरू तथा गाउँपालिकाका अध्यक्ष र उपाध्यक्ष मतदाता हुन्छन्।
प्रदेशसभा सदस्यको मतभार ५३ तथा स्थानीय तहका प्रमुख, उपप्रमुख, अध्यक्ष र उपाध्यक्षको मतभार १९ रहेको छ। जसअनुसार कांग्रेस र एमाले गठबन्धनको पल्लाभारी छ।
सुदूरपश्चिम प्रदेशमा ६ हजार १५३ मतभार छ। प्रदेश सभामा कांग्रेसका १८ जना प्रदेशसभा सांसद छन्।
यस्तै, स्थानीय तहतर्फ अध्यक्ष, उपाध्यक्ष, प्रमुख र उपप्रमुख गरेर ८६ जना छन्। जसअनुसार कांग्रेसको मात्रै मतभार दुई हजार ६०७ छ ।
नेपाली कम्युनिस्ट पार्टीका एक प्रदेशसभा सदस्य निलम्बनमा रहेका कारण मतभार एक हजार १६ छ। एमालेको एक हजार ५३३ मतभार छ।
यस्तै राष्ट्रिय स्वतन्त्र पार्टी र राप्रपाको ५३–५३ तथा स्वतन्त्रको ३ मतभार छ।
प्रतिक्रिया