युनिकोड
सिद्धार्थ बैंक नेपाल प्रिमियर लिग (एनपीएल) को दोस्रो क्वालिफायरमा लुम्बिनी लायन्स र विराटनगर किंग्स भिड्ने भएका छन्।
कीर्तिपुरस्थित त्रिवि क्रिकेट मैदानमा हुने दोस्रो क्वालिफायर खेल बिहीबार अपराह्न ४ बजे सुरु हुनेछ। पहिलो क्वालिफायरमा सुदूरपश्चिम रोयल्ससँग ७७ रनले पराजित भएपछि विराटनगरले दोस्रो क्वालिफायर खेल्न लागेको हो।
लिग चरणको अन्तिम खेलमा सुदूरपश्चिमलाई पराजित गर्दै विराटनगरले पहिलो क्वालिफायरको यात्रा तय गरेको थियो। तर पहिलो क्वालिफायरमा सुदूरपश्चिमसँग पराजित भएपछि विराटनगरले फाइनलमा पुग्न दोस्रो मौका पाएको हो।
एनपीएलमा उपाधि दाबेदार टोलीको रुपमा हेरिएको विराटनगर बिहीबार हुने दोस्रो क्वालिफायरमा लुम्बिनीलाई हराउँदै फाइनल पुग्ने लक्ष्यमा छ। लुम्बिनीविरुद्ध मैदानमा उत्रिँदा विराटनगर अघिल्लो खेलमा गरेका गल्ती दोहोर्याउने पक्षमा छैन।
लिग चरणको अन्तिम खेलमा सुदूरपश्चिमविरुद्ध गरेको प्रदर्शनलाई विराटनगरले दोहोर्याउने हो भने लुम्बिनीलाई फाइनल यात्रा तय गर्न कठिन हुनेछ। पछिल्लो समय लयमा देखिएको लुम्बिनीले एलिमिनेटर खेलमा काठमाडौँ गोर्खाजलाई चार विकेटले हराउँदै दोस्रो क्वालिफायरमा स्थान पक्का गरेको थियो।
गत सिजन अंक तालिकाको पुछारमा रहेर एनपीएल यात्रा सकाएको लुम्बिनी यो सिजन लयमा फर्किएको छ। पहिलो खेलमा जित निकालेको लुम्बिनीले त्यसपछिका तीन खेलमा लगातार हार ब्यहोरोको थियो। तर, त्यसपछिका चार खेलमा लगातार जित निकालेको लुम्बिनी यही लयलाई कायम राख्ने योजनामा हुनेछ।
दोस्रो क्वालिफायरमा लुम्बिनीलाई एलिमिनेटर खेलको जस्तो प्रदर्शनले पुग्ने छैन। बलियो विराटनगरविरुद्ध मैदान उत्रिँदा लुम्बिनी अझ बलियो भएर मैदान उत्रन जरुरी छ।
यो पनि पढ्नुहोस् : काठमाडौँलाई हराउँदै लुम्बिनी क्वालिफायरमा
प्रतिक्रिया