कप्तान रोहित पौडेलको अलराउण्ड प्रदर्शनमा एपीएफ क्लबले प्रधानमन्त्री कप एक दिवसीय क्रिकेट प्रतियोगितामा लगातार दोस्रो जित निकालेको छ।
सोमबार भएको खेलमा एपीएफले कोशी प्रदेशलाई ६ विकेटले पराजित गर्दै दोस्रो जित निकाल्दै अंक तालिकाको शीर्ष स्थानमा उक्लेको छ।
कोशीले दिएको १ सय ३५ रनको लक्ष्य एपीएफले १९.१ ओभरमा ४ विकेटको क्षतिमा भेट्टायो।
एपीएफको जितमा कप्तान रोहित पौडेलले ८० रनको उत्कृष्ट पारी खेले। ५३ बलमा ९ चौका र ३ छक्का हान्दा क्याच आउट हुन पुगे।
ओपनर प्रज्वल शाहीले २२ र सुमीत महर्जनले २० रन बनाए।
कोशीका लागि फर्दोस अन्सारी, कमल खत्री, समिर कार्की र सोनु मन्डलले समान एक विकेट झारे।
त्यसअघि माथिल्लो मूलपानी क्रिकेट मैदानमा एपीएफले टस जितेर फिल्डिङ रोजेपछि ब्याटिङ गरेको कोशी प्रदेश ४४.३ ओभरमा १ सय ३५ रन बनाउँदा अलआउट भयो।
कोशीका फिर्दोस अन्सारीले ५५ रनको योगदान दिए। ८५ बलको सामना गरेका अन्सारीले ८ चौका मद्धतमा ५५ रन बनाउँदा क्याच आउट हुन पुगे।
सोनु अन्सारीले २० रन थपे। कप्तान अंकित सुवेदीले १३ तथा सोनु मन्डलले ११ र आशिष भट्टराईले १० रन बनाए। अन्य ब्याटरले दोहोरो अंकको स्कोर बनाउन सकेनन्।
एपीएफका लागि कप्तान रोहित पौडेल एक्लैले ३ विकेट लिए। पौडेलले ७ ओभरमा १ मेडन राख्दै २४ रन खर्चे।
अमर राउटेलाले २ विकेट लिए। उनले ८ ओभरमा १ मेडन राख्दै २२ रन दिए। भुवन कार्की र मौसम ढकालले समान एक् विकेट आफ्नो नाममा गरे।
Shares
प्रतिक्रिया