रितुको अलराउण्ड प्रदर्शनमा चितवनको शानदार जित

 रितु कौनजियाको अलराउण्ड प्रदर्शन मद्दतमा चितवन राइनोजले काठमाडौंमा जारी वुमन्स च्याम्पियन्स लिग टी–२० क्रिकेट प्रतियोगिता अन्तर्गत शुक्रबार भएको खेलमा ललितपुर फाल्कोन्समाथि ८९ रनको शानदार जित हात पारेको छ।

चितवनले दिएको १ सय ३६ रनको लक्ष्य पछ्याएको ललितपुरले १७.१ ओभरमा सबै विकेट गुमाएर ४६ रनमै समेटियो । उसका कप्तान नेरी थापाबाहेक अरुले दोहोरो अंक जोड्न सकेनन् । नेरीले २० बलमा १ चौकासहित १७ रन जोडिन । यस्तै उसका कविता जोशीले ८, शान्ती चौधरीले ७ बाहेक अरुको सम्झना लायक प्रदर्शन रहेन।

ललितपुरका चार खेलाडीले खाता नै खोल्न सकेनन्। चितवनकी कविता गौतमले ४ ओभरमा १३ रन खर्चदै ३ विकेट लिइन । यस्तै रितु कनौजियाले ४ ओभरमा १० रन दिएर २ विकेट लिइन् । त्यसअघि टस हारेर ब्याटिङ गरेको चितवनले निर्धारित २० ओभरमा ३ विकेट गुमाउँदै १ सय ३५ रन बनायो।

चितवनको लागि रितु कनौजियाले ५८ रनको अविजित अर्ध शतकीय इनिङ खेलिन्। कनौजियाले ५५ बलमा ८ चौका प्रहार गरिन्। यस्तै प्यारी चौधरीले २२ रन जोडिन।