आज (सोमबार) काठमाडौंसहित देशका विभिन्न जिल्लाका खोलानालामा बाढी आउने सम्भावना रहेको बाढी पूर्वानुमान महाशाखाले जानकारी दिएको छ।
महाशाखाले सोमबार बिहान जारी गरेको सूचनाअनुसार आज काठमाडौंसहित इलाम, झापा, मोरङ, धनकुटा, सुनसरी, प्रदेश २ का सबै जिल्लामा बाढीको जोखिम छ।
यसैगरी आज उदयपुर, रामेछाप, दोलखा, काभ्रेपलाञ्चोक, सिन्धुपाल्चोक, सिन्धुली, मकवानपुर, चितवन, नवलपरासी, रूपन्देही, कपिलवस्तु भई बहने नदीमा आकस्मिक बहावको संभावना छ।
यस्तै आज, भोलि र पर्सि कन्काई, कमला, वाग्मती, नारायणी, तिनाउ नदीमा बहाव बढ्ने सम्भावना रहेको महाशाखाले जनाएको छ।
यसैबीच सुनसरीको चतरा र आसपास भारी वर्षा मापन भएको छ। महाशाखाले भनेको छ : ‘धरान-चतरा सडक खण्डमा उच्च सतर्कता अपनाऔं।’
मौसम पूर्वानुमान महाशाखाले हाल देशभर मनसुन सक्रिय रहेकाले अझै तीन दिन वर्षा जारी रहने अनुमान गरेको छ।
प्रतिक्रिया