उदयपुर सदरमुकाम गाईघाट बजारमा होटल सञ्चालन गर्दै आएका ४० वर्षीय चुडामणि फुँयाल आफ्नी बिरामी पत्नीलाई अस्पतालमै छाडेर एक वर्षदेखि बेपत्ता भएका छन्। उनी झापा दमक नगरपालिका ९ का स्थायी बासिन्दा हुन्।
एक वर्षअघि पत्नी अनितालाई गाईघाट जिल्ला अस्पतालमा भर्ना गरेर उनी बेपत्ता भएका पीडितका बाबु काशीनाथ बरालले बताए।
उदयपुरगढी गाउँपालिका ६ दनुवारबेसी निवासी बरालले छोरीलाई उपचार नगरी ज्वाइँ बेपत्ता भएकाले बाध्य भएर आफूले छोरीको उपचार गर्नुपरेको गुनासो गरे।
‘छोरी-ज्वाइँ झापाबाट गाईघाट आएर होटल खोले, त्यसपछि ज्वाइँले छोरीमाथि बारम्बार कुटपिट र अपहेलना गर्न थालेछन्,’ उनले भने, ‘छोरी सख्त बिरामी भएपछि उपचार नै नगरी ज्वाइँ बेपत्ता भए। एक वर्ष भयो, अझै फर्किएका छैनन्।’
अनिताको आन्द्रामा घाउ भएको चिकित्सकले बताएका छन्। अहिलेसम्म उनको उपचारमा १२ लाखभन्दा बढी खर्च भइसकेको छ। छोरीलाई अलपत्र पार्ने ज्वाइँको खोजी गरी कानुनी कारबाही गर्न काँसीनाथले आग्रह गरे। उनीहरूका १२ वर्षका एक छोरा छन्।
प्रतिक्रिया