आफैँले चलाएको मोटरसाइकल पल्टिँदा रुपन्देहीमा एक जनाको मृत्यु

आफैँले चलाएको मोटरसाइकल अनियन्त्रित भएर पल्टिँदा शुक्रबार रुपन्देहीमा एक जना युवाको ज्यान गएको छ।

जिल्लाको शुद्धोधन गाउँपालिका–६, का ४० वर्षीया मोटरसाइकल चालक समुजराम केवटको दुर्घटनामा मृत्यु भएको प्रहरीले जनाएको छ। दुर्घटनामा मोटरसाइकलमा सवार शुद्धोधनकै अर्का ३५ वर्षीया गुडिया केवट भने घाइते भएकी छन्।

गैडहवा गाउँपालिका–५, तेलण्डियास्थित लुम्बिनी कलौनी भित्री सडकखण्डमा लु१४प ७९४४ नम्बरको मोटरसाइकल अनियन्त्रित भएर पल्टिँदा उनीहरु घाइते भएका थिए।

उनीहरुलाई तत्काल उपचारका लागि भैरहवास्थित भीम अस्पतालमा ल्याइएको थियो। उपचारकै क्रममा समुजरामको मृत्यु भएको हो। घाइते गुडियाको उपचार भइरहेको छ। उनको हात र खुट्टामा चोट लागेको छ भने अवस्था सामान्य रहेको अस्पतालले जनाएको छ।