युनिकोड
आज देशभर मौसम बदली भई केही स्थानमा सामान्यदेखि ठूलोसम्म वर्षा हुने सम्भावना रहेको मौसमविद्ले बताएका छन्।
मौसम पूर्वानुमान महाशाखाका मौसमविद् समीर श्रेष्ठका अनुसार अहिले (नेपालखबरसँग कुरा गरेका बेला मंगलबार बिहान ८:४५ बजे) पनि चितवन, रुकुम, जाजरकोट, सल्यान तथा जुम्लामा हल्का पानी परिरहेको छ।
यसैगरी आज दिउँसो देशका केही स्थानमा मेघगर्जन/चट्याङसहित हल्कादेखि मध्यमसम्म वर्षा हुने सम्भावना छ।
‘दिउँसोलाई भारी वर्षाको सम्भावना खासै देखिएको छैन,’ मौसमविद् श्रेष्ठले भने, ‘तर पनि प्रदेश १, गण्डकी र बागमती प्रदेशका एक-दुई स्थानमा भारी वर्षा हुन सक्छ।’
राति भने अलि बढी ठाउँमा भारी वर्षाको सम्भावना देखिएको छ।
महाशाखाले मंगलबार बिहान जारी गरेको मौसम पूर्वानुमान बुलेटिनअनुसार राति देशका केही स्थानमा मेघगर्जन/चट्याङसहित हल्कादेखि मध्यम वर्षाको सम्भावना छ।
साथै प्रदेश १, प्रदेश २, बागमती प्रदेश, गण्डकी प्रदेश र कर्णाली प्रदेशका एक-दुई स्थानमा भारी वर्षा हुने सम्भावना पनि छ।
महाशाखाले मंगलबार बिहान ६ बजे आगामी २४ घण्टा (बुधबार बिहान ६ बजेसम्म) का लागि चेतावनी तथा परामर्श जारी गर्दै भनेकाे छ-
‘प्रदेश १, प्रदेश २, बागमती प्रदेश, गण्डकी प्रदेश र कर्णाली प्रदेशका एक-दुई स्थानमा भारी वर्षाको सम्भावना रहेकाले उक्त स्थानका नदीमा बहाव बढ्ने, पहाडी क्षेत्रमा भूक्षय हुने, पहिरो जाने, सडक तथा हवाई यातायात प्रभावित हुने तथा ढल/पानीको राम्रो निकास नभएका ठाउँमा डुबानसमेत हुन सक्ने भएकाले आवश्यक सतर्कता अपनाउन हुन अनुरोध छ।’
प्रतिक्रिया