युनिकोड
भारतको हैदराबादस्थित एक घरमा काम गर्ने नेपाली जोडी २ करोड भारतीय रुपैयाँबराबरको धनमाल चोरी गरेर फरार भएको आरोप लागेको छ।
द न्यु इन्डियन एक्सप्रेसका अनुसार घरेलु कामदार त्यो नेपाली जोडी घरजग्गा व्यवसायी ए नरसिंह रेड्डीकाे घरबाट नगद, गहना र विद्युतीय उपकरण गरेर २ करोड भारतीय रुपैयाँ बराबरको सम्पत्ति लिएर आइतबार राति फरार भएको हो।
माल्काजगिरीका डीसीपी रक्षिता के मुर्तीका अनुसार फरार नेपाली जोडीको खोजी गर्न विशेष समूह गठन गरिएको छ। ‘हामीले प्रमाण जुटाइसकेका छौं र घटनाकाे अनुसन्धान थालेका छौं,’ उनले भनिन्।
द न्यु इन्डियन एक्सप्रेसले लेखेअनुसार गत जुलाई २९ अर्थात् आइतबार राति रेड्डीका छोराको विवाह थियो। त्यसका लागि उनको पूरै परिवार फलाकनुमा प्यालेस गएको थियो। घरको सबै जिम्मेवारी त्यो नेपाली जोडीलाई दिइएको थियो।
त्यही मौकामा उनीहरूले सुन र हिराका गहना, विद्युतीय उपकरण र पैसा गरी २ कराेड भारतीय रुपैयाँ बराबरकाे धनमाल लिएर फरार भएको पीडित परिवारको दाबी छ।
प्रतिक्रिया