पोखरामा हायसले मोटरसाइकललाई ठक्कर दिँदा १९ वर्षीय युवकको मृत्यु

कास्कीको पोखरामा हायसले मोटरसाइकललाई ठक्कर दिँदा १९ वर्षीय युवकको मृत्यु भएको छ। 

पोखरा महानगरपालिका-१५ ढुंगेसाँघुस्थित सडकमा ग १ ज ८२५० नम्बरको हायसले ग १३ प ६०२९ नम्बरको मोटरसाइकललाई ठक्कर दिँदा बुधबार राति दुर्घटना भएको थियो। 

दुर्घटनामा मोटरसाइकल चालक पोखरा-१५, टुटुङ्गाका १९ वर्षीय सौगात भन्ने लोकबहादुर गुरूङको मृत्यु भएको प्रहरीले जानकारी दिएको छ। बुधबार राति भएको दुर्घटनामा गम्भीर घाइते भएका उनको मणिपाल शिक्षण अस्पतालमा थप उपचारको क्रममा बिहीबार बिहान मृत्यु भएको हो। 

दुर्घटनामा घाइते भएका मोटरसाइकलमा सवार एक जनाको पश्चिम क्षेत्रीय अस्पताल पोखरामा उपचार भइरहेको छ। हायस चालकलाई प्रहरीले नियन्त्रणमा लिएको छ।