युनिकोड
प्रहरीले झण्डै आठ क्विन्टल गाँजासहित पाँच जनालाई पक्राउ गरेको छ।
ललितपुर, मकवानपुर र धनकुटाबाट ७ सय ९३ किलोग्राम गाँजासहित ५ जनालाई पक्राउ गरिएको प्रहरीले जनाएको छ।
मकवानपुरको भीमफेदी गाउँपालिका-२ चुनियाबाट करिब ४ सय ३८ किलोग्राम गाँजासहित दुई जना पक्राउ परेका हुन्।
पक्राउ पर्नेमा कैलाश गाउँपालिका-१० बस्ने २७ वर्षीय राम बहादुर मोक्तानसहितका दुईजना छन्।
गएराति प्रहरी चौकी भैँसेबाट खटिएको प्रहरीले उनीहरूलाई गाँजासहित पक्राउ गरेको हो।
उनीहरूले प्रयोग गरेको लु.१ च २१५२ नम्बरको बोलेरो गाडी र बा.प्र.०३-००५ प ४५७६ नम्बरको मोटरसाइकल समेत प्रहरीले बरामद गरेको छ।
त्यसैगरि धनकुटाको साँगुरीगढी गाउँपालिका-७ गर्जुवास्थित जंगलबाट पनि २ सय ५ किलोग्राम गाँजासहित दुई जनालाई पक्राउ गरिएको प्रहरीले जनाएको छ।
पक्राउ पर्नेमा साँगुरीगढी गाउँपालिका-७ बस्ने ३३ वर्षीय प्रकाश राईसहित दुई जना छन्।
प्रदेश प्रहरी कार्यालय विराटनगर समेतबाट खटिएको प्रहरीले उनीहरूलाई गाँजा सहित पक्राउ गरेको हो।
त्यसैगरि ललितपुरकाो बाग्मती गाउँपालिका-३ छपेलीबाट करिब १ सय ५० किलोग्राम गाँजासहित एक युवक पक्राउ परेका छन्।
पक्राउ पर्नेमा मकवानपुरको हेटौंडा बस्ने रूपन्देही बुटवल उपमहानगरपालिका-७ घर भएका २८ वर्षीय नगेन्द्र श्रेष्ठ छन्।
प्रहरी चौकी भट्टेडाँडाबाट खटिएको प्रहरीले ना.३ च ४०५ नम्बरको हात्ती गाडी जाँच गर्ने क्रममा गाँजा फेला परेको हो।
प्रहरीले गाडी चालक नगेन्द्रलाई पक्राउ गरेको हो।
यी सबै घटनाका सम्बन्धमा थप अनुसन्धान जारी रहेको प्रहरीले जनाएको छ।
प्रतिक्रिया