युनिकोड
भदौ २३ र २४ गतेको घटना छानबिनका लागि गठित जाँचबुझ आयोगले पूर्वप्रहरी महानिरीक्षक चन्द्रकुवेर खापुङ र पूर्वगृहसचिव गोकर्णमणी दुवाडीसँग बयान थालेको छ।
बिहीबार आयोगले सिंहदरबारस्थित आयोग कार्यालयमा बोलाएर उनीहरूसँग बयान थालेको हो। ‘सिंहदरबारस्थित आयोग कार्यालयमा छुट्टाछुटै कोठमा दुवैजनासँग बयान चलिरहेको छ,’ आयोग स्रोतले भन्यो, ‘करिब ४ बजेदेखि बयान सुरु भएको हो।’
उनीहरूसँग बयान लिन आयोगका अध्यक्ष गौरीबहादुर कार्की, सदस्यद्वय विज्ञानराज शर्मा र विश्वेश्वर प्रसाद भण्डारीले बुधबारै प्रश्न तयार पारेका थिए। यसअघि आयोगले मंगलबार सशस्त्र प्रहरीका महानिरीक्षक राजु अर्यालसँग सोधपुछ गरेको थियो।
खापुङ जेनजी आन्दोलनका बेला नेपाल प्रहरीका महानिरीक्षक थिए। भदौ २३ गतेको आन्दोलनमा प्रहरीले अत्याधिक बल प्रयोग गरेको भन्दै आलोचना भइरहेको छ।
यसअघि खापुङलाई आयोगले स्पष्टीकरण पनि मागेको थियो। आयोग गठन भएको केही दिनमै आयोगले प्रहरीसँग फिल्डमा खटिएका प्रहरीहरूको विवरण माग गरेको थियो। जवाफमा प्रहरीले जवानदेखि आईजीपीसम्म फिल्डमा खटिएको जानकारी गराएको थियो।
त्यसको केही दिनमै कात्तिक २६ गते खापुङ अनिवार्य अवकाश भएका थिए। अवकाशमा गएका खापुङसँग त्यतिबेलाको घटनामा आयोगले सोधपुछ गर्न लागेको हो।
त्यस्तै पूर्वगृहसचिव गोकर्णमणी दुवाडी जेनजी आन्दोलनका बेला गृहसचिव रहेका थिए। उनलाई सुशीला कार्की नेतृत्वको सरकारले असोज ७ गते राष्ट्रिय योजना आयोगमा सरुवा गरिसकेको थियो।
प्रतिक्रिया