युनिकोड
कोसी प्रदेशको सङ्खुवासभा, झापा भोजपुर, तेह्रथुम र उदयपुरका विभिन्न स्थानमा चट्याङ लागेर दुई दर्जन बढी चौपाया मरेका छन्।
सङ्खुवासभाको मकालु गाउँपालिका-३ मा चट्याङले लागेर १२ वटा भैँसी, ४ वटा गाई र १ वटा गोरुको मृत्यु भएको छ। वर्षासँगै परेको चट्याङले लागेर चरनमा चरिरहेको अवस्थामा स्थानीय पुष्पलाल भण्डारीको ८ वटा भैँसी, एउटा गाई, प्रेम प्रसाद भण्डारीको ४ वटा भैँसी, २ वटा गाई र कृष्ण राईको एउटा गाई र एउटा गोरुको मृत्यु भएको हो।
यस्तै आज बिहान झापाको हल्दिबारी गाउँपालिका–२ का जयराम मुर्मुको गोठमा चट्याङ पर्दा गाई २ वटा, बाछी १ वटा, बाख्रा १ र पाठो १ को मृत्यु भएको प्रहरीले जनाएको छ। भोजपुरमा चट्याङ लाग्दा आम चोक गाउँपालिका-३ का हरी सुवेदीको गोठमा भैँसी र पाडो मरेका छन्।
तेह्रथुमको लालीगुराँस नगरपालिका-५ कि गीता कार्कीको ढुंगा माटोको ३ तल्ले घरमा चट्याङ पर्दा भित्ता चर्किएको र घरको भित्र रहेको अन्नपात, भाडावर्तन, लत्ताकपडा पूर्ण रूपमा जली नष्ट भएको तथा खोरमा रहेका २ वटा बाख्राको मृत्यु भएको प्रदेश प्रहरी कार्यालय विराटनगरले जनाएको छ।
उदयपुरको रौतामाई गाउँपालिका-५ का चक्रबहादुर राईको घरमा हावाहुरीसँगै परेको चट्याङले लागेर ढुंगा माटो टिनको छानो भएको २ तले घर र घर भित्र रहेको अन्नपात, लत्ताकपडा, भाडा वर्तन र एउटा सुँगुर जलेको प्रहरीले जनाएको छ।
प्रतिक्रिया