यी क्षेत्रमा छ आज मेघ गर्जन र चट्याङसहित वर्षाको सम्भावना

हाल देशमा मुख्यतया स्थानीय वायु तथा पश्चिमी वायुको आंशिक प्रभाव रहेको छ।

यतिबेला (मंगलबार बिहान) देशका पहाडी भूभागको मौसम आंशिक बदली छ भने बाँकी भूभागको मौसम मुख्यतया सफा रहेको मौसम पूर्वानुमान महाशाखाले जनाएको छ।

आज कोसी र गण्डकी प्रदेशका पहाडी भूभागका थोरै स्थानसँगै देशका बाँकी क्षेत्रका पहाडी भूभागका एकदुई स्थानमा मेघगर्जन र चट्याङसहित हल्का देखि मध्यम वर्षा हुने सम्भावना छ। 

त्यसैगरि कोसी, बागमती, गण्डकी र कर्णाली प्रदेशका उच्च पहाडी तथा हिमाली भूभागका एकदुई स्थानमा हल्का वर्षासँगै हिमपातकोसमेत सम्भावना रहेको महाशाखाले जनाएको छ। 

मेघगर्जन र चट्याङसहित हुन सक्ने वर्षा र हिमपातका कारण कृषि, दैनिक जनजीवन, स्वास्थ्य, सडक तथा हवाई यातायातमासमेत प्रभाव पर्न सक्ने हुँदा त्यसबाट हुन सक्ने असरबाट बच्नको लागि आवश्यक उपाय तथा सतर्कता अपनाउनसमेत महाशाखाले सबैमा अनुरोध गरेको छ।