ग्यास चुहिएर आगलागी हुँदा दुई जना घाइते, एकको अवस्था गम्भीर

कञ्चनपुरको बेदकोट नगरपालिका–१ दैजीमा शुक्रबार साँझ आगलागी हुँदा दुई जना घाइते भएका छन्।

स्थानीय धर्मराज बडूको घरमा ग्यास सिलिन्डर जडान गर्ने क्रममा ग्यास चुहावट भएर आगलागी हुँदा दुई जना घाइते भएको जिल्ला प्रहरी कार्यालय कञ्चनपुरका डीएसपी रविन्द्र पौडेलले जानकारी दिए।

उनका अनुसार घाइते हुनेहरुमा घरधनी धर्मराज बडू र बेदकोट नगरपालिका–३ का मिन बहादुर बोहरा छन्।

‘नयाँ सिलिन्डर ग्यास जडान गर्ने क्रममा ग्यास लिक भएर आगलागी भएको देखिन्छ’ डिएसपी पौडेलले भने।

ग्यास चुहावट पछि भएको आगलागीबाट घाइते भएका धर्मराज बडूको अवस्था गम्भीर रहेको प्रहरीले जनाएको छ। उनको महाकाली अस्पतालमा उपचार सम्भव नभए पछि धनगढी रेफर गरिएको छ।

अर्का घाइते मिन बहादुर बोहराको महाकाली अस्पतालमा उपचार भइरहेको छ। उनी ग्यास जडान गर्ने काम गर्छन्।