सिन्धुलीमा बसको ठक्करबाट एक युवतीसहित दुई जनाको मृत्यु, चालकको सनाखत हुन बाँकी

सिन्धुलीको सुनकोशीमा बसको ठक्करबाट मोटरसाइकलमा सवार दुई जनाको मृत्यु भएको छ।

आज बिहान सबा आठ बजे बीपी राजमार्गमा पर्ने सिन्धुलीको सुनकोशी गाउँपालिका-३ बोहरेटारमा बसको ठक्करबाट मोटरसाइकमा सवार दुई जनाको मृत्यु भएको जिल्ला प्रहरी कार्यालय सिन्धुलीले जनाएको छ।

मन्थलीबाट काठमाडौं आउँदै गरेको बागमती प्रदेश-०१-००६ ख ४५९३ नम्बरको अरनिको यातायातको बसले बा ६० प ३५४५ नम्बरको मोटरसाइलकललाई ठक्कर दिँदा दुर्घटना भएको हो।

बसको ठक्करबाट ज्यान गुमाउने युवतीको सनाखत भएको छ। दुर्घटनामा खोटाङको दिक्तेल-१० की १८ वर्षीया मुनाकला राईको मृत्यु भएको जिल्ला प्रहरी कार्यालय सिन्धुलीका एसपी राजकुमार सिलवालले जानकारी दिए। उनको घटनास्थलमै मृत्यु भएको हो।

‘दुर्घटनामा मोटरसाइकल चालकको पनि मृत्यु भएको छ,’ एसपी सिलवालले नेपालखबरसँग भने, ‘दुर्घटनामा गम्भीर घाइते भएका करिब २० वर्षीय युवकको उपचारको क्रममा स्थानीय अस्पतालमा मृत्यु भएका हो।’ मृतक पुरुषको भने सनाखतको प्रयास भइरहेको सिलवालले बताए।