थाइल्याण्डस्थित नेपाली दूतावास बैंककले नेपाली नागरिकलाई वैदेशिक रोजगारीका लागि थाइल्याण्ड, कम्बोडिया तथा लाओस नआउन आग्रह गरेको छ।
नेपालीलाई विभिन्न प्रलोभनमा पारी यी देशमा रोजगारीका लागि ल्याएर ठगी गर्ने गिरोह सक्रिय रहेको भन्दै नेपाली दूतावासले तत् तत् देशमा नेपालीका लागि रोजगारी खुला नरहेको स्पष्ट पारेको छ
नेपालीहरूलाई आकर्षक तलब सुविधा उपलब्ध गराउने भनी सामाजिक सञ्जालमा प्रचारप्रसार गरी विभिन्न कम्पनी, क्यासीनो तथा डिविजटल मार्केटिङको क्षेत्रमा काम लगाउने प्रलोभनमा पारी थाइल्याण्ड हुँदै म्यानमार, कम्बोडिया र लाओसमा नेपालीहरूलाई पर्यटक भिसामा लैजाने र अनाधिकृत रूपमा गैरकानूनी कार्यमा लगाउने तथा बन्धक बनाउने गरेको पाइएको दूतावासले बताएको छ।
‘वैदेशिक रोजगारको प्रलोभन देखाई नेपालीहरूलाई पर्यटक भिसामा थाइल्याण्डमा ल्याउने र कामदार भिसा उपलब्ध गराउने तथा अन्य मुलुकमा रोजगार उपलब्ध गराउने लगायतका विभिन्न बाहानामा म्यानमार, कम्बोडिया र लाओस पुन्याई बन्धक बनाई गैरकानूनी कार्यमा संलग्न गराउने पाईएकोले थाइल्याण्ड, कम्बोडिया तथा लाओसमा पर्यटक भिसामा आउनेहरूले कुनै पनि बाहानामा काम गर्न नपाउने र यी मुलुकहरूमा नेपालीहरूलाई वैदेशिक रोजगार समेत खुला नभएको सन्दर्भमा यी मुलुकहरूमा रोजगारीमा लगाईदिने वा अन्य रोगजार उपलब्ध गराउने बाहानामा वा प्रलोभनमा पारी नेपलीहरूलाई ल्याउने कुनै किसिमको कार्य गर्नु/गराउनु कानून बमोजिम दण्डनीय हुने भएकोले यस तर्फ सचेत रहन सम्बन्धित सबैमा अनुरोध गरिन्छ’ जारी विज्ञप्तिमा भनिएको छ।
अतः नेपाली नागरिकहरूले रोजगारीका लागि पर्यटक र भिजिट भिसामा यात्रा नगर्न र कसैले विभिन्न बाहानामा रोजगारको अवसर उपलब्ध गराउने भनी दिएको आश्वासनमा भर नपरी सम्बन्धित राजदूतावास तथा सरकारी निकायहरूबाट ततः सम्बन्धमा पूर्व जानकारी लिन समेत नेपाली राजदूतावास बैंककले आग्रह गरेको छ।
Shares
प्रतिक्रिया