युनिकोड
हुम्लाको चंखेली गाउँपालिका–६ स्थित मेल्छाम पहिरोले घर बगाउँदा ४ जनाको मृत्यु भएको छ।
गएराति मेल्छामस्थित मानवीर विकको घर पहिरोले बगाउँदा ९ जना पुरिएका थिए। तीमध्ये पाँचजनालाई जीवितै उद्धार गरिएको छ।
मृत्यु हुनेमा हुम्ला चंखेली गाउँपालिका–६ मेल्छामका ६० वर्षीय तुलसा कामी, ७ वर्षीया बसन्ता कामी, ९ वर्षीय सुस्मिता कामी र १२ वर्षीय हैजाली कामी छन्।
यस्तै, घाइते हुनेमा ३८ वर्षीय देउच्म कामी, ३६ वर्षीय औगती कामी, १२ वर्षीय निरूता कामी, १४ वर्षीय मनिका कामी र ३ वर्षीय तपेन्द्र कामी छन्।
यीमध्ये ३६ वर्षीय औगती कामीको अवस्था गम्भीर रहेको प्रहरीले जनाएको छ। घटनापछि उद्धारका लागि प्रहरी चौकी मेल्छामबाट ७ जनाको प्रहरी टोली गएको थियो।
घाइतेहरूलाई उपचारका लागि हेलिकप्टरमार्फत नेपालगञ्ज लान लागिएको कर्णाली प्रदेश प्रहरी कार्यालयका डीआइजी पोषराज पोखरेलले जानकारी दिए।
प्रतिक्रिया