युनिकोड
जारी प्रारम्भिक मतगणनामा दुई ठूला कम्युनिष्ट नेकपा एमालेका महासचिव र माओवादी केन्द्रका महासचिव पछाडि परेका छन्।
नेकपा एमाले र माओवादी केन्द्रका महासचिवहरु निरन्तर पछि परिरहँदा राष्ट्रिय प्रजातन्त्र पार्टी र नेपाली कांग्रेसका महामन्त्रीहरुले भने निरन्तर अग्रता बढाइरहेका छन्।
एकमात्र निर्वाचन क्षेत्र रहेको लमजुङमा माओवादी केन्द्रका महासचिव देव गुरुङ एमाले उपमहासचिव पृथ्वीसुब्बा गुरुङसँग ४ सय २१ मतले पछाडि परेका छन्।
उता, एमाले महासचिव पोखरेल भने दाङ क्षेत्र नम्बर २ मा माओवादी केन्द्रकी नेतृ रेखा शर्मासँग निरन्तर पछि परिरहेकी छन्।
पछिल्लो मतगणना परिणाम अनुसार त्यहाँ शर्माले २ हजार ४ सय ३४ मत प्राप्त गर्दा एमाले महासचिव पोखरेललाई १ हजार ७ सय ५१ मत प्राप्त भएको छ।
यहाँ शर्मा र पोखरेलबीचको मतान्तर ७ सय ८३ छ।
एमाले र माओवादीका महासचिवद्वय यसरी पछि पर्दा नेपाली कांग्रेस र राप्रपाका महामन्त्री भने प्रारम्भिक प्रतिस्पर्धामा अगाडि छन्।
यसमध्ये कांग्रेस महामन्त्रीद्वय गगन थापा काठमाडौँ– ४ र महामन्त्री विश्वप्रकाश शर्माले सुरुदेखि नै अग्रता लिइरहेका छन्।
पछिल्लो मत परिणाम अनुसार महामन्त्री थापाले काठमाडौँ– ४ मा ५ हजार ९ सय ९८मत प्राप्त गरेका छन्, उनलाई एमालेका राजन भट्टराईले ४ हजार ६ सय २४ सहित पछ्याइरहेका छन्।
अर्का महामन्त्री शर्मा झापा– १ मा १ हजार ७ सय ७० मत प्राप्त गरी अग्रस्थानमा छन् भने एमालेका अग्नि खरेलले १ हजार १ सय ४७ मतसहित उनलाई पछ्याइरहेका छन्।
राष्ट्रिय प्रजातन्त्र पार्टीका दुईमध्ये एक महामन्त्रीले पनि यो निर्वाचनमा निरन्तर अग्रता लिइरहेका छन्।
एमालेको समर्थन प्राप्त गरेका महामन्त्री धबल शमशेर राणा बाँके– २ मा निरन्तर अग्रस्थानमा छन्।
पछिल्लो परिणाम अनुसार राणाले २ हजार ३ सय ४६ मतसहित अग्रता लिँदा जसपाका मोहम्मद इस्तियाक राई १ हजार १ सय १३ मतसहित दोस्रो स्थानमा छन्।
यहाँ नेपाली कांग्रेसका सुदीप नर्सिंह राणा ३ सय २ मतसहित तेस्रो स्थानमा छन्।
राप्रपाकी अर्की महामन्त्री कुन्तीकुमारी शाही दैलेख–१ मा निरन्तर पछि छिन्। त्यहाँ एकीकृत समाजवादीका अमरबहादुर थापाले अग्रता लिएका छन्।
प्रतिक्रिया