युनिकोड
म्यानमारमा सेनाले सत्तारुढ दल नेसनल लिग फर डेमोक्रेसी (एनएलडी) की नेतृ आङ सान सुची, राष्ट्रपति विन मिन्टसहित प्रदेशका मुख्य मन्त्रीहरूलाई नियन्त्रणमा लिएको छ।
पार्टीका प्रवक्ता म्यो न्युनले अन्य नेताहरूलाई पनि सेनाले बिहानै नियन्त्रणमा लिएको छ।
‘म हाम्रा नेताहरुलाई जथाभावी केही नगरियोस् भन्न चाहन्छु र उनीहरूले कानुनअनुसार गरुन् भन्ने चाहन्छु,’ उनले भनेका छन्।
उनले आफूलाई पनि पक्राउ गरिने आशंका व्यक्त गरेका छन्।
राजधानी र मुख्य सहरका गल्लीमा सेनाको उपस्थिति बाक्लो देखिएको छ। राजधानीमा टेलिफोन र इन्टरनेट सेवा बन्द गरिएको छ।
यसलाई सेनाले सत्ता हत्याउने आशंका रुपमा हेरिएको छ। केही समयदेखि म्यानमारमा सरकार र सेनाबीच तनाव बढिरहेको थियो।
गत नोभेम्बरमा भएको चुनावमा एनएलडीले सरकार गठनका लागि संसद्मा स्पष्ट बहुमत प्राप्त गरेको थियो। तर सेनाले चुनावमा धाँधली भएको आरोप लगाइरहेको छ।
सोमबार हुन लागेको संसद्को बैठक पछि सार्न सेनाले सरकारलाई दबाब दिइरहेको थियो।
म्यानमारमा सन् २०११ सम्म सेनाले शासन गरिरहेको थियो। सुकीलाई लामो समयदेखि घरमै बन्दी बनाइएको थियो।
नव गठित संसदको तल्लो सदन आज बस्ने तय भएको थियो। तर सेनाले त्यसलाई रोक्न आग्रह गरिरहेका बेला यो घटना भएको हो।
बर्मा (म्यानमार) मा रहेका बीबीसीका पत्रकार दीपक भट्टराईले ट्विटरमा लेखेका छन् :
राष्ट्रपति वीन मिन्ट र आङ सान सू चीसहित सबै प्रजातान्त्रिक नेतालाई नियन्त्रणमा लिएको बर्मेली सेनाले कुनै प्रतिक्रिया दिएको छैन। बर्मेली विश्लेषकहरू सेनाले यस कदमलाई 'कु' नभनी संकटकाल मात्र भन्छ भनेका छन्। प्रजातान्त्रिक नेता र अधिकारवादीहरू भने सेनाको कदमलाई 'कु' भनेका छन्।
— Dipak Bhattarai (@dipakbhattarai) February 1, 2021
प्रतिक्रिया