युनिकोड
राष्ट्रिय स्वतन्त्र पार्टी (रास्वपा) का सभापति रवि लामिछाने तामझामका साथ पार्टी कार्यालय फर्किएका छन्।
आइतबार अपरान्ह काठमाडौंको बनस्थलीस्थित पार्टीको केन्द्रीय कार्यालयमा प्रवेश गरेका हुन्।
त्यसक्रममा उनलाई पार्टीका नेता, कार्यकर्ता र समर्थकहरूले बाजागाजासहित स्वागत गरेका थिए।
सुप्रिम सहकारी ठगी मुद्दामा उच्च अदालतको बुटवल इजलासको आदेशअनुसार रुपन्देही जिल्ला अदालतमा पौने ४ करोड धरौटी बुझाएर शुक्रबार (पुस ४ गते) नक्खु कारागारबाट रिहा भएका लामिछानेलाई पार्टी कार्यालय भित्र्याइएको हो।
रास्वपा प्रवक्ता मीनष झाका अनुसार सभापति लामिछाने साढे ८ महिनापछि आज पार्टी कार्यालय प्रवेश गरेका हुन्। यसअघि उनी अन्तिमपटक गत चैत १८ गते पार्टी कार्यालयमा उपस्थित भएको प्रवक्ता झाले बताए।
त्यस दिन रास्वपाको केन्द्रीय कार्यसमितिको विशेष बैठकको अध्यक्षता गरेका लामिछानेलाई उच्च अदालत तुलसीपुरको बुटवल इजलासले जिल्ला अदालत रुपन्देहीको आदेश बदर गर्दै थुनामा पठाउने आदेश दिएपछि चैत २२ साँझ निवासबाटै प्रहरीले पक्राउ गरेको थियो।
त्यसअघि गत माघ १३ गते रुपन्देही जिल्ला अदालतले उनलाई एक करोड धरौटीमा रिहा गर्न आदेश दिएको थियो।
तर अहिले फेरि उच्च अदालत तलुसीपुरको बुटवल इजलासले लामिछानेलाई धरौटीमा थुनामुक्त गर्न आदेश दिएको हो।
धरौटी बुझाउन गत शुक्रबार रुपन्देही पुगेका पूर्वगृहमन्त्रीसमेत रहेका रविले रिहा भएपछि शनिबार चितवनमा कार्यकर्ताहरूलाई सम्बोधन गरेका थिए।
त्यसपछि शनिबारै दिउँसो काठमाडौँ फर्किएका उनलाई त्रिभुवन अन्तर्राष्ट्रिय विमानस्थलमा रास्वपा नेता–कार्यकर्ताहरूले बाजागाजासहित स्वागत गरेका थिए।
प्रतिक्रिया