युनिकोड
नेपाली कांग्रेसले समयमै अधिवेशन गर्न नसकेर म्याद सकिएका भ्रातृ संस्थाको तदर्थ समितिको म्याद थप्ने तयारी गरेको छ। सोमबार पार्टी सभापति शेरबहादुर देउवाको निवास बूढानीलकण्ठमा बसेको पदाधिकारी तथा पूर्वपदाधिकारी बैठकमा म्याद सकिएका भ्रातृ संस्थाको म्याद थप्नेबारे छलफल भएको हो।
नेविसंघ, तरुण दललगायत भ्रातृ संस्थालाई अधिवेशन सम्पन्न गर्न गत चैत मसान्तसम्मको म्याद दिइएको थियो। तर अधिकांश भ्रातृ संस्थाले न अधिवेशन हुन सक्यो न अधिवेशनको तयारी नै गर्न सके।
कांग्रेसका १३ भ्रातृ संस्थालाई चैत मसान्तभित्र महाधिवेशन गर्न म्याद तोकिए पनि ५ वटा भ्रातृ संस्थाले मात्रै महाधिवेशन सम्पन्न गरे। महाधिवेशन गर्न नसक्ने संस्थालाई पार्टीले प्रतिवेदन उपलब्ध गराउन निर्देशन दिएको थियो। नेविसंघलगायतले तीन महिना समय दिने हो भने महाधिवेशन गर्न सकिने प्रतिवेदन दिएका थिए।
नेविसंघ, तरूण दल, महिला संघ, किसान संघलगायत भ्रातृ संस्थाहरूको कांग्रेसले नियमित महाधिवेशन गर्न सकेको छैन भने तदर्थ समिति गठनको भरमा चल्दै आइरहेको छ।
अहिलेकै तदर्थ समितिलाई निरन्तरता दिने कि नयाँ तदर्थ समिति गठन गरी महाधिवेशन गर्न समय दिने भन्नेमा कांग्रेसभित्र बहस हुँदै आएको थियो। यसबारे आगामी केन्द्रीय समिति बैठक निर्णायक रहेको नेताहरू बताउँछन्।
तर, सभापति देउवाले अहिलेकै तदर्थ समितिलाई अन्तिमपटक म्याद दिएर अधिवेशन गराउने प्रस्ताव बैठकमा गरेको बताइएको छ।
प्रतिक्रिया