युनिकोड
सुदूरपश्चिम प्रदेश सरकारको उद्योग पर्यटन वन तथा वातावरण मन्त्री नियुक्त भएका नागरिक उन्मुक्ति पार्टी (नाउपा) का रामेश्वर चौधरीले पद तथा गोपनीयताको शपथ लिएका छन्। प्रदेश प्रमुख नजिर मियाँले नवनियुक्त मन्त्री चौधरीलाई पद तथा गोपनियताको शपथ खुवाएका हुन।
यसअघिका नाउपाका पर्यटनमन्त्री लक्ष्मणकिशोर चौधरीले आर्थिक लेनदेनको अडिओ प्रकरणमा मुछिएपछि राजीनामा दिएका थिए। रिक्त मन्त्रालयमा नाउपाभित्र विवादकै बीच रामेश्वर मन्त्री बनेका हुन्।
चौधरीलाई संसदीय दलका नेता घनश्याम चौधरीले मन्त्रीका लागि सिफारिस गरेका थिए। तर नाउपा सांसद खुसीराम चौधरीले दल नेताले छलफल नै नगरी एकलौटी मन्त्री सिफारिस गरेर विधानविपरीत चलेको भन्दै रामेश्वरको शपथ ग्रहण रोक्न मुख्यमन्त्री कार्यालय, संसदीय दल र पार्टी अनुशासन समितिमा पत्र दिएका थिए।
त्यसपछि शुक्रबार हुने भनिएको शपथ रोकिएको थियो। आइतबार मात्रै पनि खुसीराम चौधरीले प्रदेश प्रमुख नजिर मियाँलाई संसदीय दलको विधिविपरीत रामेश्वरलाई मन्त्री सिफारिस गरेकोेले शपथ ग्रहण नगराउन पत्र लेखेका छन्।
दलको बैठकले बहुमतका आधारमा दल नेता घनश्याम चौधरीलाई मन्त्रीमा सिफारिस गर्ने निर्णय गरेको समेत उल्लेख गरेका छन्। तर घनश्याम दल नेता र समिति सभापति भएको भन्दै पछि हटेर उनैले रामेश्वरलाई सिफारिस गरेका हुन्।
नाउपाभित्र मन्त्री छनोटमा रडाको मच्चिएकै बेला मुख्यमन्त्री शाहले रामेश्वरलाई मन्त्री बताएका हुन। नाउपाका मन्त्रीका विषयमा तीव्र मतभेद छ। सुदूरपश्चिम प्रदेशसभामा नाउपाका ७ सांसद छन्।
त्यसपछि अध्यक्ष श्रेष्ठले बैशाख ३१ मा कैलाश चौधरीलाई मन्त्री बनाउन निर्देशन दिएकी थिइन्। कैलाश सुरुवातदेखि नै रञ्जितानिकट मानिन्छन्।
रञ्जिताले अघि सारेका कैलाशलाई मन्त्रीमा रोक्न रेशम पक्षले दल नेतासमेत रहेका घनश्यामलाई नै मन्त्री बनाउने गरी छलफल गरेको थियो। तर उनी दल नेता र अर्थ विकास तथा प्राकृतिक स्रोत समिति सभापतिसमेत रहेकाले पछि हटे।
त्यसपछि दल नेता घनश्यामले रामेश्वरलाई मन्त्रीमा अघि सारेका थिए। रामेश्वर नाउपाका संरक्षण रेशमलाल चौधरी निकट मानिन्छन्।
प्रतिक्रिया