युनिकोड
नेपाली कांग्रेसले सरकारले विगतमा भएका सम्झौता कार्यान्वयन नगर्दा शिक्षकहरू सडक केन्द्रित आन्दोलनमा रहेको बताएको छ। कांग्रेसको शिक्षा विभाग प्रमुख नैनसिंह महरले विज्ञप्ति जारी गर्दै संविधान जारी भएको १० वर्षसम्म पनि शिक्षक महासंघलगायतसँग भएको सम्झौता कार्यान्वयन नगरेकोमा आपत्ति जनाएका हुन्।
'यति बेला आवश्यक कानुन निर्माण र वर्गीय माग पूरा गराउन नेपाल शिक्षक महासंघलगायत लामो समयदेखि आन्दोलित छन्। नेपालको संविधान २०७२ जारी हुँदा संविधानको पूर्ण कार्यान्वयनका लागि आवश्यक कानुन ३ वर्षभित्र निर्माण गरिसक्नुपर्ने व्यवस्था गरिएको थियो,' उनले भनेका छन्, 'तर, संविधान जारी भएको १० वर्ष भइसक्दा पनि संसद्को गैरजिम्मेवारीले करिब ३ सय कानुन बन्न नसकेको अवस्था छ। जसका कारण कानुनी राज्यको अवधारणाको समेत खिल्ली उडाएको छ। संघीय सरकार, संसद् र सांसदहरूले कानुन निर्माण गर्ने आफ्नो पदीय दायित्व र जिम्मेवारी बोध नगरी व्यक्तिगत र पार्टीगत स्वार्थमा रुमलिँदा कानुन निर्माणले गति नलिएको तथ्य हाम्रो सामु छ।'
सरकार उचित ढंगले जिम्मेवार नहुँदा शिक्षकहरू राजधानी केन्द्रित आन्दोलन नरोकिएको र ७० लाख बालबालिकाको पढाइ प्रभावित भएको कांग्रेसले बताएको छ।
'सरकार उचित ढंगले जिम्मेवार भएर प्रस्तुत हुन नसक्दा शिक्षकहरूले २३ दिनदेखि सञ्चालन गरेको राजधानी केन्द्रित आन्दोलन रोकिन सकेको छैन भने करिब ७० लाख बालबालिकाको पढाइ प्रभावित भएको छ,' महरले जारी गरेको विज्ञप्तिमा उल्लेख छ,'यसले समयमा एसईईको नतिजा सार्वजनिक हुनेमा संशय पैदा गराएको मात्र छैन, कक्षा १२ को परीक्षा पनि प्रभावित भएको छ। राष्ट्रिय परीक्षा बोर्डले कक्षा १२ को परीक्षा वैशाख २१ गतेका लागि सारे पनि परीक्षाका लागि सहज वातावरण बनिसकेको छैन।'
शिक्षका जायज माग सम्बोधन गरी शैक्षिक क्षेत्रमा देखिएका समस्या समाधान गर्न संसद्, सरकार र सरकार सञ्चालनमा सहयोग गर्न बनेको उच्चस्तरीय संयन्त्र गम्भीर हुनुपर्ने महरको भनाइ छ।
आजबाट सुरु भएको संसद् अधिवेशनले शिक्षक आन्दोलनको निकास दिने गरी शीघ्रतिशीघ्र विद्यालय शिक्षा विधेयक पारित गर्न महरले माग गरेका छन्।
प्रतिक्रिया