युनिकोड
नेपाल प्रहरीमा रिक्त ६ जना अतिरिक्त महानिरीक्षक (एआईजी) मा बढुवा सिफारिस गर्न बसेको समितिको बैठक निस्कर्षबिनै टुंगिएको छ।
आइतबार साँझ ६ जना डीआईजीलाई एआईजीमा सिफारिस गर्न गृहसचिवको अध्यक्षतामा रहेको बढुवा समितिको बैठक बसेको थियो।
तर प्रधानमन्त्री केपी शर्मा ओली, कांग्रेस सभापति शेरबहादुर देउवा र गृहमन्त्री रमेश लेखकको सूची बाझिँदा बढुवा सिफारिस हुन नसकेको हो।
सरकारले तीनवटा ब्याचबाट दुई दुई जनालाई एआईजी बनाउने तयारी गरेको थियो।
स्रोतका अनुसार २०५२ को टोलीका चन्द्रकुवेर खापुङ र लालमणि आचार्य, २०५४ को टोलीका दानबहादुर कार्की र राजन अधिकारी तथा २०५३ को टोलीबाट सिद्धिविक्रम शाह र सुशील सिंह राठौरलाई एआईजीमा सिफारिस गर्ने तयारी थियो।
यसमा पनि ०५४ का कार्की र अधिकारीलाई अगाडि राख्ने कि २०५३ का शाह र राठाौरलाई भन्नेमा बढुवा समितिमा कुरा नमिलेको स्रोतको दाबी छ।
प्रधानमन्त्री कार्की र अधिकारीलाई तेस्रो र चौथो नम्बरमा बढुवा गर्नु पर्ने पक्षमा छन्। तर गृहमन्त्री र कांग्रेस सभापति २०५३ को टोलीलाई यसअघि रवि लामिछानेले अन्याय गरेकाले शाह र राठौरलाई नै अगाडि राख्नु पर्ने पक्षमा छन्।
२०५३ कै टोलीका कृष्णहरि शर्मा पोखरेललााई छुटाउन लागेपछि उनले पनि दबाब बढाएका छन्। कार्की र अधिकारीसँगै डीआईजी बनेका डा. मनोजकुमार केसीले पनि एआईजी बन्ने कोसिसमा छन्।
पहिलो नम्बरमा रहेका सीआईबीका निमित्त प्रमुख चन्द्रकुवेर खापुङ पहिलो नम्बरमा र मधेस प्रदेशको प्रहरी प्रमुख रहेका लालमणि आचार्यलाई दोस्रो नम्बरमा बढुवा गर्न समितिमा एक मत छ।
दुवै २०५२ कात्तिक २७ गते प्रहरी निरीक्षकमा भर्ना भएका र अहिलेका डीआईजीमा सबैभन्दा सिनियर हुन्।
यस्तै लुम्बिनी प्रदेश प्रहरी प्रमुख दानबहादुर कार्की र कोसी प्रदेशका प्रहरी प्रमुख राजन अधिकारी पनि बढुवामा नछुट्ने सूचीमा छन्। विशेष ब्युरोका प्रमुख सिद्धिविक्रम शाह र प्रबन्ध निर्देशनालयमा कार्यरत सुशीलसिंह राठौर पनि एआईजीमा सिफारिस हुने सूचीमा छन्।
तर अब दुई दिनपछि मात्रै पुनः समितिको बैठक बस्ने तयारी रहेकाले यसमा हेरफेर हुने सम्भावनासमेत छ।
प्रतिक्रिया